გერმანიამ დაზვერვის ყოფილი უფროსი ჯაშუშობის ბრალდებით დააკავა

ჰანინგი BND-ს 1998 წლის დეკემბრიდან 2005 წლის ნოემბრამდე ხელმძღვანელობდა. გამომძიებლების თქმით, 2010 წელს მან მანფრედ დ.-სგან ფულის სანაცვლოდ სადაზვერვო სამსახურის საიდუმლო ინფორმაციის მიღება მოაწყო. 2022 წლისთვის ჰანინგმა BND-ს დაახლოებით 2 000 შიდა დოკუმენტი მოიპოვა. მათ შორის იყო მასალები ირანის ბირთვული პროგრამისა და რუსეთის შეიარაღებული ძალების შესახებ.

ერთ შემთხვევაში მან დოკუმენტებით უცხო ქვეყნის სადაზვერვო სამსახურის ოფიცრისთვის ანალიტიკური ანგარიში მოამზადა. უცნობია, რომელ ქვეყანას ეხებოდა ეს შემთხვევა. Süddeutsche Zeitung-ის, NDR-ისა და WDR-ის ცნობით, ეს ეპიზოდი რუსეთს არ უკავშირდებოდა.

ჰანინგი მრავალი წლის განმავლობაში კიდევ ერთ უცხოელ დაზვერვის ოფიცერთან ურთიერთობდა, თუმცა მისი ქვეყანაც უცნობია. იგი ოფიცერს პოლიტიკურ ინფორმაციას, მათ შორის მანფრედ დ.-სგან მიღებულ მასალებს გადასცემდა.

დამოუკიდებელმა რუსულმა საგამოძიებო გამოცემამ The Insider-მა დაადგინა, რომ ჰანინგი 2015-დან 2019 წლამდე რუსეთში სულ მცირე შვიდჯერ გაფრინდა. ვიზიტები ხანმოკლე იყო, ზოგიერთი ერთ დღეზე ნაკლებს გაგრძელდა.

Süddeutsche Zeitung-ის ცნობით, ჰანინგის რუსეთთან კავშირების შესახებ ხმები ჯერ კიდევ აღმოსავლეთ გერმანიის პერიოდში, აღმოსავლეთ ბერლინში მისი დიპლომატიური საქმიანობიდან ვრცელდებოდა. თუმცა ეს ხმები მტკიცებულებებით არასდროს გამყარებულა.

2013 წელს ჰანინგი ლონდონის სასამართლოში უსაფრთხოების ექსპერტის სტატუსით ჩვენებას აძლევდა. კომპანია „რუსალში“ (Rusal) წილის გაყიდვასთან დაკავშირებულ დავაში იგი ბიზნესმენ ოლეგ დერიპასკას უჭერდა მხარს.

ჰანინგი ასევე ლონდონის საკონსულტაციო კომპანია G3-ის რუსულ განყოფილებაში კონსულტანტად მუშაობდა და ლატვიური PNB Banka-ს სამეთვალყურეო საბჭოს წევრი იყო. PNB-ში მუშაობისას იგი რუსული წარმოშობის ორ ბიზნესმენს შორის დავაში შუამავლობდა. ჰანინგთან დაკავშირებულ უსაფრთხოების კომპანიებში რუსეთთან კავშირის მქონე პირებიც მუშაობენ.