ღაზაში შენობის ჩამონგრევას 21 ადამიანი ემსხვერპლა

შენობას „საადა“, ანუ „ბედნიერება“ ერქვა და მასში სულ მცირე 100 იძულებით გადაადგილებული ადამიანი ცხოვრობდა. ექვსსართულიანი შენობა შუაღამისას წამებში ჩამოინგრა. ძილში სულ მცირე 21 პალესტინელი დაიღუპა, მათ შორის 12 ბავშვი, ხოლო კიდევ 45 ადამიანი დაშავდა.

მსხვერპლის რაოდენობა შესაძლოა გაცილებით გაიზარდოს. ნანგრევებში, სავარაუდოდ, სულ მცირე კიდევ 100 ადამიანი მოყვა, რომელთა ნახევარი ბავშვია. ღაზის ქალაქის თალ ალ-ჰავის რაიონში მდებარე შენობა უსაფრთხო არ იყო. კონფლიქტის საწყის ეტაპზე ისრაელის პირველი საჰაერო დარტყმის შემდეგ შენობას კონსტრუქციული დაზიანებები ჰქონდა და გადახრილი იყო. აშკარა საფრთხის მიუხედავად, ლტოლვილთა ბანაკებში არსებული მძიმე პირობების გამო იქ ათმა იძულებით გადაადგილებულმა ოჯახმა შეაფარა თავი. ღაზაში მომხდარი ტრაგედია იმ უკიდურეს პირობებს უკავშირდება, რომლებშიც პალესტინის მოსახლეობა ცხოვრობს. ჰამასის დაქვემდებარებაში მოქმედი სამოქალაქო თავდაცვის სამსახურის ცნობით, შენობაში ბზარები წინა დღეს გაჩნდა. შენობას 2024-დან 2025 წლამდე პერიოდში რამდენჯერმე დაარტყეს. მოსახლეობა ადრეც გააფრთხილეს, რომ იქ არ დაბრუნებულიყო. სამოქალაქო თავდაცვის სამსახურის პრესსპიკერმა მაჰმუდ ბასალმა განმარტა: „მათ სხვა არჩევანი არ აქვთ. კარვებისა და ხელმისაწვდომი სახლების გარეშე ისინი ბზარებიან და დაზიანებულ შენობებში ცხოვრობენ, მიუხედავად ჩამონგრევის საფრთხისა“.

ღაზაში გაეროს განვითარების პროგრამის (UNDP) დირექტორმა ალესანდრო მრაკიჩმა განმარტა, რომ ხალხს სახიფათო შენობებში გადასვლას სამშენებლო მასალების მწვავე დეფიციტიც აიძულებს. ეს დეფიციტი ისრაელის მიერ შეზღუდულ ღაზას მძიმე მდგომარეობაში აყენებს. სამაშველო ჯგუფები ღამიდან უწყვეტად მუშაობდნენ ნანგრევებში მოყოლილი ადამიანების გამოსაყვანად. კადრებში მთელი შენობა ნამსხვრევების უზარმაზარ გროვადაა ქცეული. მაშველები ხელთ არსებული საშუალებებით მუშაობენ, მოსახლეობა კი შიშველი ხელებით თხრის. ძებნას წითელი ჯვარი, გაეროს სააგენტოები და რამდენიმე ეგვიპტური ჯგუფი შეუერთდნენ. გაეროს ოფიციალური პირების ცნობით, სათანადო ხელსაწყოების ნაკლებობის გამო სამუშაო ნელა მიმდინარეობს. ისრაელი კვლავ ზღუდავს სხვადასხვა სახის აღჭურვილობის შეტანას, რომელსაც „ორმაგი დანიშნულებისად“ მიიჩნევს, რადგან მისი სამხედრო გამოყენებაცაა შესაძლებელი. ჰამასმა აშშ-ს მოუწოდა, სამაშველო აღჭურვილობის შეტანა უზრუნველყოს.

ღაზის ქალაქის სამოქალაქო თავდაცვის სამსახურის დირექტორმა რაედ ალ-დაჰშანმა ბი-ბი-სის განუცხადა: „ნანგრევებიდან ჯერ კიდევ გვესმის ხმები, ამიტომ ადამიანების ცოცხლად პოვნის იმედი კვლავ გვაქვს“. ღაზის ხელისუფლება ჩამონგრევაზე მორალურ პასუხისმგებლობას ისრაელს აკისრებს. მან განცხადებაში დაწერა: „სრულ პასუხისმგებლობას ოკუპაციასა და საერთაშორისო თანამეგობრობას ვაკისრებთ“. ხელისუფლებამ აღნიშნა, რომ კონფლიქტის დაწყების შემდეგ ღაზაში ჩამონგრეული შენობების ქვეშ 8 500 ადამიანი უგზო-უკვლოდ დაკარგულად ითვლება. ათასობით ადამიანი კვლავ ავარიულ შენობაში ცხოვრობს. ახლა შეშფოთებას მოახლოებული ზამთარი იწვევს, რადგან წვიმამ ისედაც სახიფათო კონსტრუქციები შესაძლოა კიდევ უფრო დაასუსტოს. სამოქალაქო თავდაცვის სამსახურმა მშვიდობის საბჭო (Board of Peace) და ზავის გარანტორი ქვეყნები გააფრთხილა, რომ ტერიტორიას „გარდაუვალი კატასტროფა“ ემუქრება.