იემენის მთავრობამ ჰუსიების წინააღმდეგ სამხედრო ოპერაცია დაიწყო

ამ განცხადებას ბოლო დღეებში ჰუსიებსა და საუდის არაბეთის ხელმძღვანელობით მოქმედ კოალიციას შორის საპასუხო დარტყმები უძღოდა წინ. ჰუსიებმა კვირას განაცხადეს, რომ საუდის არაბეთის ეროვნული ნავთობკომპანია არამკოს ობიექტებს დაარტყეს.

დაჯგუფების თქმით, თავდასხმა 12 საათში იემენზე კოალიციის მიერ განხორციელებული 50 საჰაერო და სარაკეტო დარტყმის პასუხი იყო. საუდის არაბეთს განცხადება ჯერ არ გაუკეთებია.

კონფლიქტი სექტემბერში გამწვავდა, როცა ჰუსიებმა ქვეყნის მთელი სანაპირო წითელ ზღვაზე დაიკავეს. მათ შორისაა ბაბ-ელ-მანდების სრუტეში გამავალი სასიცოცხლოდ მნიშვნელოვანი სანაოსნო გზა. ამან ნავთობის გლობალური მიწოდება კიდევ უფრო შეაფერხა.

იემენის დედაქალაქი სანა, რომელსაც ჰუსიები ათ წელზე მეტია აკონტროლებენ, უწყვეტი თავდასხმების სამიზნე გახდა. სამთავრობო ძალები დაჯგუფების სამხედრო შესაძლებლობების შესუსტებას ცდილობენ.

ჰუსიებზე თავდასხმები იემენის სხვა ნაწილებშიც გავრცელდა. მათ შორისაა ქვეყნის ჩრდილოეთში მდებარე საადის რეგიონი, რომელიც დაჯგუფების მთავარი საყრდენია.

იემენის პრეზიდენტმა რაშად ალ-ალიმიმ კვირას სატელევიზიო მიმართვაში განაცხადა: „დღეს რესპუბლიკის დარჩენილი ტერიტორიის დასაბრუნებლად სამხედრო ოპერაციების დაწყებას ვაცხადებ. მიზანია, სახელმწიფოსა და მისი ინსტიტუტების ძალაუფლება ქვეყნის მთელ ტერიტორიაზე გავრცელდეს“.

თუმცა ჯერ გაურკვეველია, ნიშნავს თუ არა ეს კონფლიქტის ახალი ეტაპის დაწყებას.

იემენში საბრძოლო მოქმედებების მთავარი ხაზი კვლავ მნიშვნელოვან ქალაქ ტაიზთან გადის. ქალაქს ჯერ კიდევ საერთაშორისოდ აღიარებული მთავრობა აკონტროლებს.

ჰუსიები რეგიონზე კონტროლის დასამყარებლად სამთავრობო ძალებს სასტიკად ებრძვიან. ისინი სანაპირო ტერიტორიებისა და, შესაბამისად, ბაბ-ელ-მანდების სრუტის ხელში ჩაგდებას ცდილობენ.

AFP-ის ცნობით, ჰუსიებმა კვირას ტაიზისა და იემენის მთავრობის დროებითი დედაქალაქის, ადენის დამაკავშირებელი სასიცოცხლოდ მნიშვნელოვანი მომარაგების გზა გადაკეტეს.

AFP-ი სამ იემენელ სამხედრო წყაროზე დაყრდნობით ასევე იტყობინება, რომ ჰუსიები ახლა ამ ტერიტორიასა და მომარაგების გზას აკონტროლებენ. შედეგად, ტაიზი ფაქტობრივად ალყაში მოექცა.

„მათ ტაიზის ადენისგან იზოლირების სამხედრო მიზანს მიაღწიეს, მიუხედავად იმისა, რომ ქალაქზე სრული კონტროლი არ დაუმყარებიათ“, განუცხადა AFP-ს ანალიტიკური ცენტრის, ჩატემ ჰაუსის (Chatham House), მკვლევარმა ფარეა ალ-მუსლიმიმ.

იემენის ფარგლებს გარეთ ჰუსიები საუდის არაბეთისთვის ზიანის მიყენებასაც ცდილობენ. მათი თავდასხმის სამიზნე ქვეყნის ეკონომიკის მთავარი საყრდენი, ნავთობია.