ინგლისის ნაკრებს შემოდგომაზე სემ ანდერჰილი დააკლდება

ანდერჰილმა „სტუპზე“ გამართული და მოგებული შეხვედრის 48-ე წუთზე მოედანი დატოვა. მატჩის ბოლოს მას ხელზე სახვევი ეკეთა. მორაგბეს ოპერაცია ამ კვირის ბოლოს დასჭირდება.

„ბათი“ ვარაუდობს, რომ 30 წლის მორაგბე დეკემბრამდე ან იანვრამდე ვერ ითამაშებს. შესაბამისად, ის შიდა სეზონის დიდ ნაწილსა და ნოემბერში ინგლისის ნაკრების სამ შეხვედრას გამოტოვებს. გუნდი ავსტრალიას, იაპონიასა და ახალ ზელანდიას დაუპირისპირდება.

„ბათის“ რაგბის ხელმძღვანელმა იოჰან ვან გრანმა თქვა, რომ ტრავმის სერიოზულობა მაშინვე გააცნობიერა. სწორედ ამიტომ მივიდა ანდერჰილთან დაუყოვნებლივ, როცა მან მოედანი დატოვა.

ვან გრანმა BBC Radio Somerset-ს უთხრა: „ზოგიერთი ტრავმის შემთხვევაში, უბრალოდ, მსურს, მდგომარეობა მაშინვე ვიცოდე, რადგან მესმის მისი გრძელვადიანი გავლენა. მოთამაშეებს ყოველთვის თანავუგრძნობ და ამიტომაც მაშინვე ჩავედი“.

მან დასძინა: „იმ მომენტში ვიფიქრე, რომ სკანირებას უნდა დავლოდებოდით, თუმცა ეს შესაძლოა ბიცეფსის გაწყვეტა ყოფილიყო. სკანირებამ ზუსტად ეს დაადასტურა.

მას ოპერაციას ხუთშაბათს გაუკეთებენ, ამიტომ რამდენიმე თვე ვერ ითამაშებს. სემის თვალთახედვით, ეს იდეალური ნამდვილად არ არის“.

„ბათისა“ და „ლესტერის“ შეხვედრა, რომელიც 26 დეკემბერს უნდა გამართულიყო, ერთი დღით გადაიდო

დაბრუნებები, ბურთისთვის ფეხის მოქნევები და დაწნული თმა: პრემიერშიპის მთავარი თემები

ანდერჰილმა ინგლისის ნაკრებში 51 მატჩი ჩაატარა. წელს მან ექვსი ერის თასზე გუნდის ხუთივე შეხვედრაში ითამაშა.

თუმცა მან მხრის ტრავმის გამო ოპერაცია გაიკეთა და სამხრეთ აფრიკის, ფიჯისა და არგენტინის წინააღმდეგ ზაფხულის მატჩები გამოტოვა.

ვან გრანმა დასძინა: „თითოეული მოთამაშისთვის ყოველთვის გულდასაწყვეტია, როცა მოსამზადებელ შეხვედრაში ან პირველ ტურში ტრავმას იღებს, რადგან მანამდე ხანგრძლივი წინასასეზონო მომზადება გაიარა.

ტრავმები ამ თამაშის განუყოფელი ნაწილია. სემს რამდენიმე მძიმე ტრავმა ჰქონდა. დარწმუნებული ვარ, რაც შეიძლება მალე დაბრუნდება. მოუთმენლად ველით მის დაბრუნებას, როცა უნდა მოხდეს ეს, დეკემბერში თუ იანვარში“.

„ბათს“ ვერც ახალწვეული ჯეიმი ბატი ეხმარება, რომელმაც წინასასეზონო მომზადებისას წინამხარი მოიტეხა. იმავე პოზიციაზე მოთამაშე ვილიკესა სელა ნოემბრამდე ვერ ითამაშებს. მან წინასასეზონო მომზადებისას ფეხის თითი დაიზიანა. გარემარბმა უილ მიურიმ კი გასულ სეზონში მხარი დაიზიანა და მისი დაბრუნების თარიღი ჯერ უცნობია.

ბენ სპენსერი და ლუი ჰენესი გუნდურ ვარჯიშს ოქტომბერში უნდა დაუბრუნდნენ.