ინგლისში აშშ-ის სამხედრო ბაზასთან მცხოვრებლები სახლებიდან გაიყვანეს

გლოსტერშირის პოლიციამ (Gloucestershire Police) კვირას განაცხადა, რომ ევაკუაცია უელფორდში მიმდინარეობდა. სოფელი სამეფო სამხედრო-საჰაერო ძალების ფერფორდის ბაზასთან მდებარეობს, სადაც აშშ-ის სამხედრო-საჰაერო ძალები ოპერაციებს ატარებს.

საგანგებო სამსახურების მიერ ინციდენტის გამოძიებისას მცხოვრებლები დასასვენებელ ცენტრში გადაიყვანეს.

პოლიციამ განაცხადა: „არმიის სპეციალისტთა ჯგუფი, რომელიც ასაფეთქებელ მოწყობილობებს ანეიტრალებს, ამჟამად რამდენიმე სატრანსპორტო საშუალებას ამოწმებს“.

ტერიტორიის გარშემო უსაფრთხოების ზონა მოეწყო. პოლიციის თქმით, ინციდენტი ლოკალიზებულია.

ბი-ბი-სის ცნობით, ადგილზე საგანგებო სამსახურების მრავალი თანამშრომელი იმყოფებოდა. მათ შორის იყო სახიფათო ზონაში რეაგირების ჯგუფი, რომელიც სახიფათო მასალებთან დაკავშირებული ინციდენტებისა და სხვა რთული საგანგებო შემთხვევებისას სპეციალიზებულ სამედიცინო დახმარებას უზრუნველყოფს.

გლოსტერშირის პოლიციამ განაცხადა: „მასშტაბური ინციდენტის გამოცხადების შემდეგ, უელფორდის რაიონში მცხოვრებლები რამდენიმე სახლიდან ამჟამად გაჰყავთ.

ეს ასაფეთქებელი ნივთიერებების შესახებ კანონის დარღვევაში ეჭვმიტანილი რამდენიმე კაცის დაკავებას მოჰყვა“.

პოლიციის განცხადებით, გამოძიება გრძელდება. უწყებამ საზოგადოებას მოუწოდა, საგანგებო სამსახურების მუშაობის დასრულებამდე დაზარალებულ ტერიტორიას მოერიდოს.