ხელოვნური ინტელექტის მონაცემთა ცენტრები გაზის ელექტროსადგურების აშენებას გეგმავენ

BloombergNEF-ის კვლევის თანახმად, ხელოვნური ინტელექტის მონაცემთა ცენტრების დეველოპერები ენერგიაზე მოთხოვნის დასაკმაყოფილებლად ადგილზე კლიმატისთვის დამაზიანებელი გაზის ელექტროსადგურების მასშტაბურად აშენებას გეგმავენ.

კვლევის თანახმად, აშშ-ში, გაერთიანებულ სამეფოსა და კონტინენტურ ევროპაში დაგეგმილი მონაცემთა ცენტრები ადგილზე წიაღისეული საწვავის ელექტროსადგურების აშენებას აპირებენ. ეს ეროვნულ ელექტროქსელებთან მიერთების შეფერხებებითაა განპირობებული. დაგეგმილი გაზის სადგურების ჯამური სიმძლავრე 181 გიგავატი იქნება. ეს დიდი ბრიტანეთის ელექტროენერგიაზე პიკური მოთხოვნის თითქმის ოთხჯერ მეტია.

BloombergNEF-ის კვლევით, ელექტროენერგიის სწრაფად მიწოდების ეს გეგმა, თუ განხორციელდა, აშშ-ში წელიწადში დაახლოებით 345 მილიონი მეტრული ტონა ნახშირორჟანგის ეკვივალენტს გამოყოფს. გაზზე მომუშავე ადგილზე განთავსებული სადგურების 90% სწორედ აშშ-ში იგეგმება. ეს დაახლოებით 72,8 მილიონი წიაღისეული საწვავით მოძრავი ავტომობილის წლიურ სათბურის აირების ემისიებს უტოლდება.

ანგარიში ოთხშაბათს გამოქვეყნდა, როცა მსოფლიო ლიდერები თურქეთში გაეროს კლიმატის 31-ე სამიტზე შეიკრიბნენ. დისკუსიების მთავარი თემაა ელექტრიფიკაციის გაფართოება, სასურველია, სუფთა წყაროების გამოყენებით. თუმცა, ევროპის რამდენიმე მნიშვნელოვანი ლიდერი, მათ შორის საფრანგეთისა და გერმანიის წარმომადგენლები, COP31-ს არ დაესწრება. ისინი დუბლინში გაემგზავრებიან, სადაც ევროკავშირის ლიდერები პარასკევს ხელოვნური ინტელექტის საკითხებზე პირველ სპეციალურ სამიტს გამართავენ.

BloombergNEF-ში მონაცემთა ცენტრებისა და ახალი ტექნოლოგიების მიმართულების ხელმძღვანელმა, მარკ დეილიმ, განაცხადა: „ხელოვნურ ინტელექტთან დაკავშირებული განსაკუთრებული ეკონომიკური შესაძლებლობების გამო, ელექტროენერგიის სწრაფად მიწოდება მონაცემთა ცენტრების დეველოპერებისთვის ერთ-ერთ უმნიშვნელოვანეს პრიორიტეტად იქცა და მათ საქმიანობას ზღუდავს“.

დეილიმ დასძინა: „კლიმატზე გავლენა დამოკიდებული იქნება არა მხოლოდ იმაზე, რამდენ ელექტროენერგიას მოიხმარენ ეს ობიექტები, არამედ იმაზეც, რამდენად სწრაფად შეძლებენ ქსელები მათ მიერთებას და დაემატება თუ არა ენერგოსისტემებს ამ მოთხოვნის დასაკმაყოფილებლად უფრო სუფთა წყაროები“.

ანგარიშის თანახმად, 2035 წლისთვის ხელოვნური ინტელექტის მონაცემთა ცენტრების ელექტროენერგიის მოხმარება, სავარაუდოდ, თითქმის ოთხჯერ გაიზრდება და 2 354 ტერავატსაათს მიაღწევს. ეს მსოფლიო ელექტროენერგიის მოთხოვნის 7%-ის ტოლია.

ხელოვნური ინტელექტის მონაცემთა ცენტრებს დიდი რაოდენობით ელექტროენერგია სჭირდებათ სერვერების მუშაობისთვის, მოწყობილობების გასაგრილებლად და ობიექტის სისტემების სამართავად.