რეგულატორი: ხელოვნური ინტელექტი კურსის ნაშრომების შეფასებას თითქმის შეუძლებელს ხდის

ინგლისის უმაღლესი განათლების მარეგულირებლის, სტუდენტების ოფისის (Office for Students, OfS), გამოძიების თანახმად, უნივერსიტეტებმა სტუდენტების შესაფასებლად ტრადიციული გამოცდები და აუდიტორიაში პრეზენტაციები უნდა დააბრუნონ. ლექტორები ჩიოდნენ, რომ ხელოვნურმა ინტელექტმა (AI) კურსის ნაშრომების შეფასება „თითქმის შეუძლებელი“ გახადა.

სტუდენტების ოფისის თქმით, ინგლისის უნივერსიტეტების დიპლომების სანდოობას საფრთხეს უქმნის ხელოვნური ინტელექტის ფართოდ გამოყენება ესეებში, დისერტაციებსა და „ღია წიგნის“ გამოცდებში. სტუდენტები ამბობდნენ, რომ მათი თანატოლები ტრაბახობდნენ, პერსონალმა ვერ შეამჩნია, ისე გამოვიყენეთ ხელოვნური ინტელექტიო.

მარეგულირებელმა გააფრთხილა უნივერსიტეტები და უმაღლესი განათლების სხვა დაწესებულებები, რომ ხელოვნური ინტელექტის არასწორი გამოყენების წინააღმდეგ სტუდენტების ცოდნისა და უნარების „სანდო და საიმედო შეფასების ზომების“ შემუშავების ჩავარდნამ შესაძლოა რეგისტრაციის პირობები დაარღვიოს და სანქციები გამოიწვიოს.

სტუდენტების ოფისის სტრატეგიისა და განხორციელების დირექტორმა, ჯოშ ფლემინგმა, თქვა, რომ უმაღლეს განათლებაში ხელოვნური ინტელექტის გამოყენება „დღევანდელი სისტემისთვის თაობათა მასშტაბის რისკს ქმნის და საფრთხეს უქმნის როგორც სტუდენტების სწავლას, ისე დაწესებულებების უნარს, შეაფასონ ისინი“.

ფლემინგმა დასძინა: „ამ რისკების მოსაგვარებლად გაცილებით მეტი ძალისხმევა გვჭირდება, მათ შორის, ხელოვნური ინტელექტის გარეშე ჩატარებული შეფასებების გაცილებით ფართოდ გამოყენება.

„გამოწვევისა და შესაძლებლობის მასშტაბი და ტემპი სექტორისთვის და ჩვენთვის, როგორც მარეგულირებლისთვის, სრულიად ახალ გამოწვევას ქმნის. უნივერსიტეტებთან და კოლეჯებთან თანამშრომლობას გავაგრძელებთ, რათა მათ ხელოვნური ინტელექტის სარგებელი მიიღონ და ამავე დროს რისკებს აარიდონ თავი“.

სტუდენტების ოფისის ცნობით, ბევრმა დაწესებულებამ უკვე შეცვალა სტუდენტების შეფასების წესი, რათა ხელოვნური ინტელექტის შესაძლო არასწორი გამოყენება შეემცირებინა. მათ შორისაა აუდიტორიაში წერითი გამოცდებისა და ზეპირი გამოცდების, ე.წ. ვივების, უფრო ფართოდ გამოყენება.

სხვა მაგალითებია დავალებები, რომლებშიც სტუდენტები ხელოვნური ინტელექტის მიერ შექმნილ მასალას აკრიტიკებენ ან არედაქტირებენ. ასევე, „პროცესზე დაფუძნებული“ შეფასებები, რომლებშიც სტუდენტები აღწერენ, როგორ მოიძიეს მასალა და მოამზადეს ნაშრომი.

განათლების დეპარტამენტის წარმომადგენელმა განაცხადა: „უნივერსიტეტებისგან მოველით, რომ ამ საკითხს სერიოზულად მოეკიდებიან. ასევე, მოველით, რომ სტუდენტების ოფისი ეფექტიანად აღასრულებს მოქმედ სტანდარტებს და სწრაფად იმუშავებს, რათა მის მარეგულირებელ ჩარჩოში ხელოვნური ინტელექტის გამოყენების წესები მკაფიო, მტკიცე და მდგრადი იყოს“.