ირანის არმიამ ჰორმუზის სრუტის აღმოსავლეთით MQ-1 დრონი ჩამოაგდო

გვარდიის კორპუსის თქმით, ეს მისი საჰაერო თავდაცვის სისტემის მიერ შეჩერებული და განადგურებული მე-14 MQ-1 იყო.

ISNA-ს ცნობით, შემთხვევა ჰორმუზის სრუტის აღმოსავლეთით, სირიქის სანაპირო ზოლის მოპირდაპირე მხარეს, ცაში მოხდა.

MQ-1 აშშ-ში წარმოებული უპილოტო საფრენი აპარატია, თუმცა გვარდიის კორპუსს განცხადებაში არ დაუზუსტებია, ვინ მართავდა დრონს.

შემთხვევა ირანის წინააღმდეგ აშშ-ისა და ისრაელის შესაძლო ახალი იერიშის მზარდი ნიშნების ფონზე მოხდა.

უოლ სტრიტ ჯორნალმა (The Wall Street Journal) სამშაბათს დაწერა, რომ ვაშინგტონმა სპარსეთის ყურის რამდენიმე არაბულ ქვეყანას მოუწოდა, 3 ნოემბრის აშშ-ის შუალედური არჩევნების შემდეგ თეირანის წინააღმდეგ „ხანმოკლე, ინტენსიური სამხედრო კამპანიისთვის“ მოემზადებინათ.

გამოცემის ცნობით, აშშ-ის პრეზიდენტ დონალდ ტრამპს საბოლოო გადაწყვეტილება არ მიუღია, თუმცა არჩევნების შემდეგ მასშტაბური იერიშისკენ იხრება.

აშშ-მა და ისრაელმა ირანის წინააღმდეგ ომი 28 თებერვალს დაიწყეს. თეირანმა საპასუხოდ რეგიონში სარაკეტო და დრონებით იერიშები მიიტანა და ჰორმუზის სრუტე, ენერგომომარაგებისთვის მნიშვნელოვანი მარშრუტი, ფაქტობრივად ჩაკეტა.

ივნისში გაფორმებული ურთიერთგაგების მემორანდუმი საბოლოო სამშვიდობო შეთანხმების გზის გასაკვალად იყო გამიზნული, თუმცა მოგვიანებით ჩაიშალა უთანხმოებების გამო, მათ შორის სრუტეში ნაოსნობასთან დაკავშირებით.