ისრაელის არმიამ ფილმ „ნაზას“ გამო გამოძიება დაიწყო

ზამირმა განაცხადა, რომ ფილმი განზრახ ამახინჯებს რეალობას და არმიისა და ისრაელის სახელმწიფოს ლეგიტიმურობას ძირს უთხრის. მან დაგეგმვის სამმართველოს უფროსის ხელმძღვანელობით უწყებათაშორისი და მრავალპროფილური ჯგუფის შექმნა ბრძანა.

ჯგუფი შეიმუშავებს სამოქმედო გეგმებსა და საშუალებებს იმ ბრალდებების წინააღმდეგ, რომლებსაც სამხედროები ისრაელის თავდაცვის ძალებისა და მისი ჯარისკაცების წინააღმდეგ გავრცელებულ სიცრუედ მიიჩნევენ. ჯგუფი ისრაელელ და უცხოელ ექსპერტებთან ითანამშრომლებს.

ზამირმა სამხედრო გენერალურ პროკურორს ფილმთან და მასში ჩართულ პირებთან დაკავშირებით შესაძლო სამართლებრივი ზომების შესწავლა და ხელშეწყობაც დაავალა. არმია ცალკე შეისწავლის ფილმის წარმოების კიბერუსაფრთხოების ასპექტებს. მათ შორისაა გადაღებისას გამოყენებული საიდუმლო მასალის უნებართვოდ გამჟღავნებაში შესაძლო მონაწილეთა ჩართულობა.

ზამირმა ასევე მოითხოვა ფართომასშტაბიანი საჯარო დიპლომატიური მუშაობა როგორც ქვეყნის შიგნით, ისე საერთაშორისო დონეზე. ამ ძალისხმევაში საგარეო საქმეთა სამინისტრო, იუსტიციის სამინისტრო, საჯარო დიპლომატიის ეროვნული სამმართველო და სხვა შესაბამისი უწყებები ითანამშრომლებენ.

ისრაელის თავდაცვის ძალების განცხადებით: „ჩვენ ყველა ხელმისაწვდომ საშუალებას გამოვიყენებთ ჩვენი ჯარისკაცების, მეთაურებისა და საბრძოლო ძალების, ასევე ისრაელის არმიის რეპუტაციის დასაცავად“.

პრემიერ-მინისტრმა ბენიამინ ნეთანიაჰუმ სოციალურ ქსელში გამოქვეყნებულ ერთწუთიან ვიდეოში „ნაზა“ გააკრიტიკა. ისრაელში წარმოებული დოკუმენტური ფილმი ღაზაში IDF-ის მოქმედებებს ეხება და ვენეციაში დააჯილდოეს.

ნეთანიაჰუმ თქვა: „მის შესახებ გავიგე და ეს შემაძრწუნებელია. მთელ მსოფლიოში ანტისემიტიზმის წაქეზებას ვებრძვით, მაგრამ, როცა ის ჩვენივე წიაღიდან მოდის, ეს მიუღებელია“. ამის შესახებ გამოცემა „თაიმს ოფ ისრაელი“ (Times of Israel) იტყობინება.