კალასი ევროკავშირს ისრაელის დასახლებებთან ვაჭრობის აკრძალვისკენ მოუწოდებს

ევროკავშირის უმაღლესმა დიპლომატმა კაია კალასმა განაცხადა, რომ ისრაელის უკანონო დასახლებებთან ვაჭრობის აკრძალვა ევროკავშირისთვის „პრინციპული პოზიცია“ იქნებოდა. მან დასავლეთ სანაპიროზე უკანონო დასახლებები რუსეთის მიერ ყირიმის ოკუპაციას შეადარა.

კალასმა პარასკევს გამოქვეყნებულ Irish Times-ის ინტერვიუში განაცხადა: „თუ ყირიმის ოკუპაციის მაგალითს ავიღებთ, მაშინ ყველაფერი ძალიან მკაფიო იყო: ეს უკანონოა, ჩვენ ამას არ ვაღიარებთ, რაც ნიშნავს, რომ ყირიმიდან შემოსული ნებისმიერი პროდუქტით ვაჭრობას ვწყვეტთ. იგივე პრინციპული პოზიცია უნდა გვქონდეს: იცით, რომ ეს უკანონოა და ამას ყველა ეთანხმება, ამიტომ ოკუპირებულ ტერიტორიებთან ვაჭრობა უნდა შევწყვიტოთ“.

ევროკავშირსა და ნატოში ისრაელის მისიამ (Mission of Israel to the EU and NATO) ამ კომენტარებს „ღრმად სამწუხარო“ უწოდა.

მისიამ განაცხადა: „განსაკუთრებით დღეს, ებრაული ახალი წლის წინა დღეს, ძნელი დასაჯერებელია, რომ მან იერუსალიმის დასავლეთის კედელსა და ებრაულ კვარტალსა და ყირიმში არსებულ ვითარებას შორის პირდაპირი პარალელი გაავლო, მიუხედავად მისი პირადი მსოფლმხედველობისა“.

ევროკავშირის საგარეო პოლიტიკის ხელმძღვანელი დიდი ხანია მხარს უჭერს რამდენიმე წევრი ქვეყნის მცდელობას, ზეწოლა მოახდინონ ევროკომისიაზე, რათა მან ისრაელის მიერ უკანონოდ ოკუპირებულ ტერიტორიებთან ვაჭრობა აკრძალოს. ეს საკითხი დედაქალაქებს ყოფს და კალასსა და ევროკომისიის პრეზიდენტ ურსულა ფონ დერ ლაიენს შორის დაპირისპირების ერთ-ერთ მთავარ თემად იქცა.

კალასის მხარდაჭერამ ევროკომისიას ნაბიჯის გადადგმა ჯერჯერობით ვერ აიძულა. ივლისში ევროკავშირის საგარეო საქმეთა მინისტრების მხოლოდ მცირე ნაწილმა მოუწოდა ევროკომისიას, წევრი ქვეყნებისთვის კენჭის საყრელად კონკრეტული ზომები წარედგინა. ნიდერლანდები, ბელგია, შვედეთი და კიდევ რამდენიმე ქვეყანა ევროკავშირის მასშტაბით შეზღუდვებს ითხოვდნენ. თუმცა ჩეხეთმა ახალი სანქციების დაბლოკვის პირობა დადო, რითაც ევროკავშირის დედაქალაქებს შორის საჭირო ერთსულოვნებას ხელი შეუშალა.

დებატები სამშაბათს კვლავ განახლდა. ევროკავშირის რვა ქვეყანა, მათ შორის საფრანგეთი, ესპანეთი და ირლანდია, გაერთიანებულ სამეფოსა და კანადას შეუერთდა და ისრაელის დასახლებებისთვის სავაჭრო სანქციების დაწესების პირობა დადო.

კალასმა განცხადების შემდეგ თქვა: „ევროკავშირის ყველა წევრი სახელმწიფო თანხმდება, რომ დასავლეთ სანაპიროზე ისრაელის დასახლებები საერთაშორისო სამართლის მიხედვით უკანონოა. დასავლეთ სანაპიროზე ისრაელის მთავრობის მიერ დასახლებების გაფართოება სიცოცხლისუნარიანი ორი სახელმწიფოს პრინციპზე დაფუძნებული გადაწყვეტის პერსპექტივას ძირს უთხრის“.