კასპაროვი დასავლეთის დაზვერვის გაფრთხილებებზე საუბრობს

კასპაროვმა ასევე განმარტა, რომ ცნობა მისი „თავდასხმის სამიზნეთა სიაში“ ყოფნის შესახებ მოულოდნელი არ ყოფილა, თუმცა მაინც შოკისმომგვრელია. კასპაროვმა და ტიუტრინმა 2016 წელს თავისუფალი რუსეთის ფორუმი (Free Russia Forum) დააარსეს. ორგანიზაცია უკრაინის შეიარაღებული ძალების მხარდაჭერას ემხრობა და ომის საწინააღმდეგო კონფერენციებს მართავს. კრემლმა ფორუმი 2023 წელს „არასასურველ ორგანიზაციად“ გამოაცხადა, ხოლო 2025 წელს „ტერორისტული“ ორგანიზაციების სიაში შეიყვანა. კასპაროვი აშშ-ში ემიგრაციაში ცხოვრობს.

კასპაროვმა ეს განცხადება მას შემდეგ გაავრცელა, რაც აშშ-ის იუსტიციის სამინისტრომ სექტემბრის შუა რიცხვებში რუსეთის დაზვერვის ხუთ სავარაუდო აგენტს ბრალი დასდო. უწყების მტკიცებით, ისინი მსოფლიოში, მათ შორის აშშ-ში, თავდასხმებსა და მკვლელობებს გეგმავდნენ. იუსტიციის სამინისტროს ცნობით, ჯგუფი ამ ზაფხულს აშშ-ში მცხოვრები „ცნობილი რუსი დისიდენტის“ მკვლელობის ორგანიზებას ცდილობდა. აშშ-ის ხელისუფლებას კრემლის კრიტიკოსის ვინაობა არ დაუსახელებია.

აშშ-ის იუსტიციის სამინისტროს მონაცემებით, რუსეთის აგენტები ლიტვაში კიდევ ერთი სამიზნის მკვლელობის ორგანიზებასაც ცდილობდნენ. ტიუტრინი ემიგრაციაში ლიტვის დედაქალაქ ვილნიუსში ცხოვრობს. მან AFP-ს უთხრა, რომ აშშ-ის იუსტიციის სამინისტროს განცხადების შემდეგ ლიტვის ხელისუფლებამ გააფრთხილა: „სასწრაფოდ უნდა დავტოვო ჩემი სახლი და ავტომობილი მოვიშორო“.

აშშ-ის ხელისუფლების მიერ გამჟღავნებული სავარაუდო გეგმა დისიდენტების მოსკოვის მხრიდან დევნის შემდგომი გამწვავება იქნებოდა. ის ასევე დასავლეთის ტერიტორიაზე რუსეთის ოპერაციების მასშტაბის ზრდაზე მიუთითებდა. რუსეთის უსაფრთხოების სამსახურებს ევროპაში კრემლის მოწინააღმდეგეები არაერთხელ ამოუღიათ მიზანში, თუმცა აშშ ათწლეულების განმავლობაში ხელშეუხებელ ტერიტორიად რჩებოდა.