ლუკოილის აქტივების გაყიდვა აშშ-რუსეთის მოლაპარაკებების ნაწილი გახდა

ნიუ-იორკ ტაიმსის ცნობით, ვლადიმერ პუტინმა ლუკოილის აქტივების გაყიდვის საკითხი პირადად წამოჭრა 5 სექტემბერს. ის სტივ უიტკოფსა (Steve Witkoff) და ჯარედ კუშნერს (Jared Kushner) ესაუბრებოდა. ისინი აშშ-ის პრეზიდენტ დონალდ ტრამპის სპეციალური წარმომადგენლები არიან და რუსეთ-უკრაინის ომის შესახებ მოლაპარაკებებს უძღვებიან.

გაზეთის ერთ-ერთი წყაროს თქმით, პუტინმა გარიგების ბოლომდე მიყვანა შესთავაზა. მისი თქმით, ეს დაადასტურებდა, რომ რუსებსა და ამერიკელებს ერთად ბიზნესის წარმოება შეუძლიათ.

ფაინენშალ ტაიმსის (Financial Times) ცნობით, ინვესტორთა ჯგუფში ჩელსის ყოფილი თანამფლობელი ტოდ ბოელი (Todd Boehly) შედის. ჯგუფში ასევე არიან არაბთა გაერთიანებული საამიროების პრეზიდენტის ძმა, შეიხი ტაჰნუნი (Sheikh Tahnoon), და კატარული ალ-ხაიატის ოჯახი (Al-Khayyat). ყველა მათგანს ტრამპისა და უიტკოფის ოჯახებთან კავშირები აქვს.

ბოელიმ ტრამპის პოლიტიკურ პროექტებს 2 მილიონი დოლარი შესწირა. ძმები ალ-ხაიატები ალბანეთში კურორტს კუშნერთან და მის მეუღლესთან, პრეზიდენტის ქალიშვილ ივანკა ტრამპთან ერთად აშენებენ. შეიხმა ტაჰნუნმა კუშნერის, უიტკოფისა და ტრამპის ვაჟების პროექტებში ფული ჩადო.

აშშ-ის იუსტიციის დეპარტამენტის ყოფილმა პროკურორმა ჰუი ჩენმა (Hui Chen) ნიუ-იორკ ტაიმსს განუცხადა, რომ კუშნერისა და უიტკოფის კავშირები გარიგების მხარეებთან ინტერესთა კონფლიქტის საკითხს აჩენს. მისი თქმით, ეს ნათლად აჩვენებს, რატომ არ უნდა იყვნენ ტრამპის მეგობრები და ოჯახის წევრები მისი საგარეო პოლიტიკის მრჩევლები.

ტრამპის ადმინისტრაციამ ლუკოილს 2025 წლის შემოდგომაზე სანქციები დაუწესა. ამის შემდეგ კომპანიამ დაახლოებით 20 მილიარდი დოლარის ღირებულების უცხოური აქტივებისთვის მყიდველის ძებნა დაიწყო. კვლავ გაურკვეველია, საბოლოოდ რა ფასად შეიძლება გაიყიდოს ეს აქტივები.

რუსეთთან დაკავშირებული სავაჭრო კომპანია განვორი (Gunvor) პირველი იყო, რომელმაც ლუკოილის უცხოური ბიზნესი შეიძინა. თუმცა, აშშ-ის ხელისუფლებამ მას კრემლის „მარიონეტი“ უწოდა და გარიგების დამტკიცებაზე უარი თქვა. კიდევ ერთი მსურველი ამერიკული საინვესტიციო ფონდი კარლაილი (Carlyle) გახდა, თუმცა აშშ-ის ფინანსთა სამინისტროს მისი განაცხადიც ჯერ არ დაუმტკიცებია.