Nvidia-ს სკანდალის შედეგები ფართოვდება, ტრამპის ფინანსთა მინისტრი კოლეგას ადანაშაულებს

აშშ-ის ფინანსთა მინისტრმა სკოტ ბესენტმა კომერციის დეპარტამენტი დაადანაშაულა, რომ მან სათანადოდ ვერ გააკონტროლა Nvidia-ს მაღალი წარმადობის ჩიპების ექსპორტი. დეპარტამენტს ჰოვარდ ლუტნიკი ხელმძღვანელობს. სკანდალის შედეგები კი ფართოვდება.

ჯენსენ ჰუანგმა Nvidia დატოვა მას შემდეგ, რაც ცნობილი გახდა, რომ მას ურთიერთობა ჰქონდა კომპანია Megaspeed-ის ყოფილ ხელმძღვანელთან, რომელიც, სავარაუდოდ, ჩინეთის ჯაშუში იყო. Megaspeed Nvidia-სგან მოწინავე ჩიპებს ყიდულობდა.

მედიის ცნობით, აშშ-ის სამთავრობო უწყებები Megaspeed-ს იძიებდნენ ჩინეთში ჩიპების კონტრაბანდის ეჭვის გამო. თუმცა კომპანია იმ ფირმების სიაში არ არის, რომლებთანაც აშშ-ის კომპანიებს თანამშრომლობა ეკრძალებათ.

ბესენტმა სი-ენ-ბი-სის განუცხადა, რომ რამდენიმე უწყება „თვეების განმავლობაში მხარს უჭერდა Megaspeed-ის იმ კომპანიების სიაში შეყვანას, რომლებთანაც საქმიანობა აკრძალულია“.

მან დასძინა: „მაგრამ საბოლოო სიტყვა კომერციის დეპარტამენტს ეკუთვნის... მათი შიდა პროცედურების შესახებ მათ უნდა ჰკითხოთ“.

ლუტნიკზე ორივე პოლიტიკური ბანაკიდან მზარდი ზეწოლაა, რათა მან თავისი დეპარტამენტის მოქმედებები ახსნას.

მას მომავალ თვეში სენატის საბანკო კომიტეტის წინაშე ჩვენების მისაცემად დაიბარეს. კომიტეტი კომერციის დეპარტამენტის როლს გამოიძიებს, რომელმაც Nvidia-ს მოწინავე ჩიპების ექსპორტი დაუშვა.

კონგრესის სხვა კომიტეტებმა ლუტნიკსა და მის დეპარტამენტს მოსთხოვეს, შეინახონ ყველა ჩანაწერი, რომელიც Nvidia-სა და ჰუანგს ეხება.

ბესენტმა განაცხადა, რომ „იმედგაცრუებულია“ კომპანიის ექსპორტის კონტროლის სიაში შეყვანის დაგვიანებითა და ცნობებით, რომ ხელოვნური ინტელექტის ჩიპები ჩინეთში ჟონავს.

ბესენტის თქმით, „პრეზიდენტმა ტრამპმა ნათლად თქვა, რომ ჩინეთმა H100-ზე უფრო მაღალი კლასის Nvidia-ს ჩიპები არ უნდა მიიღოს. ამიტომ ნებისმიერი გაჟონვა ძალიან იმედგამაცრუებელია, რადგან ხელოვნური ინტელექტის სფეროში ჩვენს დიდ კომპანიებს აზარალებს და ჩინელებს უპირატესობას აძლევს“.

ნიუ-იორკ ტაიმსის ცნობით, გასულ წელს კომერციის დეპარტამენტი Megaspeed-ს იძიებდა ეჭვის საფუძველზე, რომ კომპანია Nvidia-ს მოწინავე ხელოვნური ინტელექტის ზოგი ჩიპის ჩინეთში კონტრაბანდით შეტანას ცდილობდა. Megaspeed-ს კომენტარისთვის მიმართეს.

კომერციის დეპარტამენტზე ზეწოლა იყო, რომ კომპანია აკრძალულთა სიაში შეეყვანა. თუმცა ფაინენშალ ტაიმსის ცალკეული ინფორმაციით, დეპარტამენტი ღრუბლოვანი გამოთვლების კომპანიასთან დაკავშირებით ამ ნაბიჯს აჭიანურებდა.