ომანის მახლობლად გემს ცეცხლი გაუჩნდა, ირანთან დაძაბულობის შიში იზრდება

ბრიტანეთის სამეფო ფლოტის დაქვემდებარებაში მყოფ სააგენტოს ხანძრის მიზეზსა და შესაძლო მსხვერპლზე ინფორმაცია არ გაუვრცელებია.

თუმცა ბოლო პერიოდში ირანმა გააძლიერა თავდასხმები გემებზე, რომლებიც, მისი აზრით, წყალსავალს სათანადო ნებართვის გარეშე იყენებენ.

ირანის ისლამური რევოლუციის გვარდიის კორპუსმა (IRGC) ხუთშაბათს განცხადებაში თქვა, რომ ბოლო 24 საათის განმავლობაში სამ ნავთობმზიდს აფეთქება და ხანძარი გაუჩნდა. მათი თქმით, ეს გემები ზღვის ნაღმებს მას შემდეგ შეეჯახნენ, რაც „უნებართვო“ მარშრუტით გადაადგილება სცადეს. უცნობია, არის თუ არა UKMTO-ს მიერ ნახსენები გემი მათ შორის.

ეს ინფორმაცია გავრცელდა მას შემდეგ, რაც ირანმა განაცხადა, რომ წყალსავალის აღმოსავლეთით კიდევ ერთი ამერიკული დრონი ჩამოაგდო. აშშ-ირანის ომის ახალი ესკალაციის შიში იზრდება.

UKMTO-ს ცნობით, კიდევ ერთი გემის კაპიტანმა ხანძრის შესახებ შეატყობინა. ცეცხლმოკიდებული გემი ომანში, ხასაბის ჩრდილოეთით, 9 საზღვაო მილის (17 კილომეტრის) დაშორებით შენიშნეს. ქალაქი სრუტის მახლობლად მდებარეობს.

ეკიპაჟის მდგომარეობა უცნობია. ამ დრომდე არც გემის დაზიანებისა და არც გარემოზე ზემოქმედების შესახებ ინფორმაცია არ გავრცელებულა.

ახლო აღმოსავლეთის ომი თებერვალში ირანზე აშშ-ისა და ისრაელის თავდასხმებით დაიწყო. მას შემდეგ თეირანი ცდილობს, სრუტეზე კონტროლი დაამყაროს. ეს გლობალური ნავთობისა და ბუნებრივი აირის მიწოდებისთვის მნიშვნელოვანი სატრანზიტო მარშრუტია. ირანი თავს ესხმის გემებს, რომლებსაც წყალსავალის უნებართვო მომხმარებლებად მიიჩნევს.

საზღვაო გადაზიდვების მონაცემების მომწოდებელი Kpler-ის მონაცემებით, გასულ კვირას წყალსავალში ნავთობის ექსპორტი კვლავ შემცირდა.

აშშ-ში დაფუძნებული კვლევითი ცენტრის, ახლო აღმოსავლეთის პოლიტიკის ვაშინგტონის ინსტიტუტის მონაცემებით, ომის დაწყების შემდეგ სრუტეში გემებზე თავდასხმები ყველაზე მასშტაბურია.

აშშ-ის საზღვაო ფლოტი ირანული გემების წინააღმდეგ საკუთარ ბლოკადას ახორციელებს. ბოლო პერიოდში მან სრუტეში ნავთობმზიდებს გააცილა, იმ რაიონში, სადაც, გავრცელებული ინფორმაციით, ცეცხლმოკიდებული გემი შენიშნეს.

ხანძრის შესახებ ცნობები გავრცელდა მას შემდეგ, რაც ირანმა განაცხადა, რომ მისმა ძალებმა სრუტის მახლობლად დრონი ჩამოაგდეს. სააგენტო Tasnim-მა ისლამური რევოლუციის გვარდიის კორპუსზე დაყრდნობით გაავრცელა ცნობა, რომ გამოყენებული იყო ახალი, მოწინავე საჰაერო თავდაცვის სისტემა.

ცნობის თანახმად, ომის დაწყების შემდეგ ირანის შეიარაღებულმა ძალებმა ამ ტიპის 14 დრონი და 50-ზე მეტი MQ-9 Reaper-ის დრონი გაანადგურეს.