OpenAI-ს Hugging Face-ის გატეხვის გამო უჩივლეს

სარჩელი უსაფრთხო მეცნიერებისა და ტექნოლოგიების სამართლებრივი ადვოკატირების ორგანიზაციამ (Legal Advocates for Safe Science and Technology, LASST) და იურიდიულმა ფირმამ Gerstein Harrow შეიტანეს. მათ სან-ფრანცისკოში, კალიფორნიის უმაღლეს სასამართლოს მიმართეს. OpenAI-ის სათავო ოფისიც სან-ფრანცისკოში მდებარეობს. სარჩელის თანახმად, OpenAI-ის აგენტებმა ზაფხულში Hugging Face-ის სისტემაში შეღწევით კალიფორნიის კომპიუტერულ მონაცემებზე ყოვლისმომცველი წვდომისა და თაღლითობის კანონი (Comprehensive Computer Data Access and Fraud Act, CDAFA) დაარღვიეს. სარჩელი შეიტანეს მაშინ, როცა სხვადასხვა კომპანია კონტროლიდან გასული აგენტების შესახებ ინფორმაციას კვლავ ასაჯაროებს. მოსარჩელეები აცხადებენ, რომ OpenAI ამ მოქმედებაზე პასუხისმგებელი უნდა იყოს. ისინი იანვრიდან მოქმედ კალიფორნიის კანონს ეყრდნობიან, რომლის თანახმადაც, ხელოვნურმა ინტელექტმა მოსარჩელეს ზიანი ავტონომიურად რომ მიაყენა, ეს დაცვის საფუძველი ვერ გახდება.

LASST-ის დამფუძნებელმა ტაილერ უიტმერმა უაირდს განუცხადა: „ჩვენი აზრით, უკიდურესად მნიშვნელოვანია, რომ ხელოვნური ინტელექტის კომპანიებს მათ მიერ გამოწვეული ზიანისთვის პასუხისმგებლობა არსებული კანონების აღსრულებით დაეკისროთ. ეს განსაკუთრებით მნიშვნელოვანია, როცა ზიანს ავტონომიური აგენტები იწვევენ, რადგან ამას აშკარა და უკიდურესად სახიფათო, მსოფლიოში სრულიად ახალ მოვლენად მივიჩნევთ“.

OpenAI-მ კომენტარის მოთხოვნას დაუყოვნებლივ არ უპასუხა.

ფლორიდის გენერალურმა პროკურორმა ჯეიმზ უთმაიერმა ორშაბათს OpenAI-ის წინააღმდეგ დროებითი სასამართლო აკრძალვა მოითხოვა. მისი მიზანია, კომპანიამ დამოუკიდებელი ზედამხედველობის გარეშე მოდელები ვეღარ შექმნას. ეს ნაბიჯი უკავშირდება სარჩელს, რომელიც ფლორიდამ ივნისში OpenAI-ისა და მისი აღმასრულებელი დირექტორის, სემ ალტმანის წინააღმდეგ შეიტანა. უთმაიერმა განცხადებაში თქვა: „OpenAI-მ მთავრობას სთხოვა, ანძაზე მიებათ. ახლა ფლორიდა დახმარების ამ თხოვნას პასუხობს“.

ხელოვნური ინტელექტის აგენტების მთავარი დანიშნულება მომხმარებლის სახელით მოქმედებაა. ამიტომ დეველოპერები და უსაფრთხოების მკვლევრები დიდი ხანია ვარაუდობენ, რომ მანქანური სწავლების განვითარებას არასასურველი „აგენტური“ მოქმედებების საფრთხე მოჰყვება. ფართოდ გამოყენებულ სამომხმარებლო სისტემებში ჩაშენებულმა დამცავმა ზომებმა მასობრივი უკონტროლო მოქმედებები აქამდე უმეტესად აღკვეთა. თუმცა შესაძლებლობები სწრაფად ვითარდება და ზოგჯერ დამცავი შეზღუდვები ითიშება. მაგალითად, Hugging Face-ის შემთხვევაში OpenAI-მ ტესტირებისთვის მოდელის გარკვეული შეზღუდვები მოხსნა. შედეგად, კონტროლიდან გასული აგენტების მოქმედებები, როგორც ჩანს, გახშირდა.

მთავრობები ხელოვნური ინტელექტის რეგულირებას განიხილავენ. ისინი სიცოცხლისთვის არსებულ საფრთხეებთან ერთად ეკონომიკურ და ეროვნული უსაფრთხოების საკითხებსაც ითვალისწინებენ. ამ ფონზე მკვლევრები და ადამიანები მთელ მსოფლიოში ხელოვნური ინტელექტისთვის ანგარიშვალდებულების მექანიზმებს სულ უფრო ხშირად ითხოვენ. სამართლებრივი ექსპერტები ძირითადად ხაზს უსვამენ, რომ პასუხისმგებლობისა და ბრალეულობის საკითხებს მხოლოდ სასამართლო საქმეებით შექმნილი პრეცედენტები გადაწყვეტს.