პენტაგონმა ირანის დარტყმებით აშშ-ის ბაზებზე დიდი ზიანი აღიარა

აშშ-ის სამთავრობო ზედამხედველმა ორშაბათს ირანთან ომის შედეგებზე პირველი ანგარიში გამოაქვეყნა. უწყებამ შეიარაღებულ ძალებში მოწინავე იარაღის დეფიციტი აღიარა. ანგარიშმა ასევე პირველად წარმოაჩინა ახლო აღმოსავლეთში ამერიკული თვითმფრინავების, ბაზებისა და დიპლომატიური წარმომადგენლობების ზიანი.

ინფორმაციის დიდი ნაწილი ბოლო ექვსი თვის განმავლობაში უკვე გავრცელდა. თუმცა, პენტაგონის გენერალური ინსპექტორის ანგარიშში კონფლიქტის საფასურის ყველაზე სრული ოფიციალური შეფასება გამოქვეყნდა. შეფასება მოიცავდა ამერიკელთა დაღუპვას, გადასახადის გადამხდელთა ხარჯებსა და მატერიალურ ზიანს. დოკუმენტში თავდაცვისა და სახელმწიფო დეპარტამენტების ზედამხედველი სამსახურების, ასევე აშშ-ის საერთაშორისო განვითარების სააგენტოს (U.S. Agency for International Development) ინფორმაციაც შევიდა.

ანგარიშის გამოქვეყნების შესახებ ინფორმაცია პირველად NBC News-მა გაავრცელა. დოკუმენტში აღნიშნულია, რომ ირანთან აშშ-ის ომმა მოწინავე იარაღთან დაკავშირებით „სტრატეგიული მარაგების დეფიციტი გამოიწვია და საბრძოლო მასალის შევსებისთვის სამრეწველო ბაზის შემაფერხებელი რგოლები გამოავლინა“. ექსპერტებმა მანამდე განაცხადეს, რომ სამხედრო კონტრაქტორებს მოწინავე რაკეტებისა და თავდაცვითი რაკეტსაწინააღმდეგო სისტემების ომამდელ დონემდე შესავსებად დაახლოებით სამი წელი დასჭირდებათ.

ანგარიში 1 აპრილიდან 30 ივნისამდე პერიოდს მოიცავს. დოკუმენტმა ასევე დაადასტურა, რომ ირანის დარტყმებმა ქუვეითში, ბაჰრეინში, კატარში, არაბთა გაერთიანებულ საამიროებში, საუდის არაბეთში, ერაყში, ომანსა და იორდანიაში აშშ-ის ბაზებზე ასობით შენობა და სხვა ნაგებობა დააზიანა ან გაანადგურა. ათობით ამერიკული თვითმფრინავი და დრონიც დაზიანდა ან განადგურდა.

თავდაცვის მინისტრმა პიტ ჰეგსეთმა ივლისის ბოლოს კონგრესს განუცხადა, რომ ომის ხარჯმა იმ დროისთვის 37,5 მილიარდი დოლარი შეადგინა.

თუმცა, აშშ-ის დიპლომატიური ობიექტების დანახარჯები მანამდე საჯაროდ არ გამოქვეყნებულა. ანგარიშის თანახმად, ყველაზე დიდი მატერიალური ზიანი ერაყში, ქუვეითში, საუდის არაბეთსა და არაბთა გაერთიანებულ საამიროებში მდებარე წარმომადგენლობებმა მიიღეს. სავარაუდო ღირებულებამ 184 მილიონი დოლარი შეადგინა.

სახელმწიფო დეპარტამენტმა ივნისის დასაწყისში განაცხადა, რომ კონფლიქტთან დაკავშირებულმა მთლიანმა ხარჯმა 113 მილიონი დოლარი შეადგინა. აქედან თითქმის 80 მილიონი დოლარი საგანგებო გეგმების განხორციელებას მოხმარდა. თანხა მოიცავდა აშშ-ის პერსონალის, მათი ოჯახების, სხვა ამერიკელი მოქალაქეებისა და შესაბამისი უფლებამოსილების მქონე მესამე ქვეყნების მოქალაქეების ევაკუაციის ხარჯებს.

სახელმწიფო დეპარტამენტის ცნობით, 28 თებერვალს ირანზე აშშ-ისა და ისრაელის პირველი დარტყმების შემდეგ ტრამპის ადმინისტრაციამ ახლო აღმოსავლეთისა და ევროპის ქვეყნებიდან აშშ-ის დაახლოებით 9 000 მოქალაქე გაიყვანა. ევაკუაცია კერძო და კომერციული რეისებით, ასევე სახმელეთო და საზღვაო გზებით განხორციელდა. ივნისის ბოლოსთვის დეპარტამენტის ოპერაციის ღირებულებამ 11 მილიონ დოლარზე მეტი შეადგინა.