პოლონეთმა და უკრაინამ მატარებელზე რუსეთის დარტყმას ესკალაცია უწოდეს

პოლონეთის პრემიერ-მინისტრმა დონალდ ტუსკმა განაცხადა, რომ მოსკოვისგან ომის ესკალაციას „მომდევნო კვირებში“ ელოდა. მან ეს განცხადება უკრაინაში ვარშავისკენ მიმავალ მატარებელზე რუსეთის დარტყმის შემდეგ გააკეთა. მატარებელი პოლონეთის საზღვრიდან მხოლოდ ორ კილომეტრში იმყოფებოდა.

ევროკავშირის საგარეო პოლიტიკის უმაღლესმა წარმომადგენელმა კაია კალასმა განაცხადა, რომ პოლონეთის საზღვართან რუსეთის დარტყმის მიზანი კიევის მხარდამჭერი დასავლეთის ქვეყნების „დაშინება“ იყო.

კალასმა თქვა: „აშკარაა, რომ ეს დასავლეთის ქვეყნების დაშინებას ემსახურება, რათა მათ უკრაინას მხარი არ დაუჭირონ და მხარდაჭერის გამოსახატავად უკრაინაში არ ჩავიდნენ“. მან კიევის მხარდამჭერებს „საპირისპიროს“ გაკეთებისკენ მოუწოდა.

ამასთან, პოლონეთის საგარეო საქმეთა მინისტრმა რადოსლავ სიკორსკიმ მოკავშირეებს უკრაინის მხარდაჭერის „გაორმაგებისკენ“ მოუწოდა. მან მომხდარს ასევე „ესკალაცია“ უწოდა.

დარტყმის დროს მატარებელი იაჰოდინის სადგურზე იდგა. გავრცელებული ცნობებით, მხოლოდ მატარებლის ლოკომოტივი დაზიანდა. უკრაინის ხელისუფლებამ განაცხადა, რომ ყველა მგზავრი გაიყვანეს და არავინ დაშავებულა.

დარტყმამდე ცოტა ხნით ადრე იაჰოდინში, იმავე სარკინიგზო ხაზზე, სხვა მატარებელმა გაიარა. მას ევროკავშირის მაღალი თანამდებობის პირები და გაერთიანებული სამეფოს ყოფილი პრემიერ-მინისტრი ბორის ჯონსონი გადაჰყავდა. ისინი კიევში გამართული კონფერენციიდან პოლონეთის მიმართულებით ბრუნდებოდნენ.

თავდასხმის დროს იმავე სადგურზე სხვა მატარებელში ცენტრალური სადაზვერვო სააგენტოს (CIA) ყოფილი დირექტორი დევიდ პეტრეუსი იმყოფებოდა. პეტრეუსმა ნიუ-იორკ ტაიმსს (The New York Times) უთხრა, რომ ზემოდან რუსული დრონების ხმა, შემდეგ კი აფეთქება გაიგონა. მან მომხდარს „შემზარავი“ უწოდა.

რუსეთმა განაცხადა, რომ ევროპული ქვეყნებიდან სამხედრო ტვირთის გადასაზიდად გამოყენებულ „სარკინიგზო ინფრასტრუქტურას“ დაარტყა.

უკრაინის პრეზიდენტმა ვოლოდიმირ ზელენსკიმ მოსკოვი ლოკომოტივზე „განზრახ“ დარტყმაში დაადანაშაულა.

ზელენსკიმ თქვა: „სწორედ იმისთვის, რომ ეს დარტყმები ევროპაში უფრო შორს არ გავრცელდეს, უკრაინელი კაცები და ქალები ყოველდღე იბრძვიან, სიცოცხლეს სწირავენ და აგრესიის გაფართოებას არ უშვებენ“.

სხვა ადგილებში, კვირას უკრაინაზე რუსეთის დარტყმებს ქალაქ კრამატორსკში სულ მცირე ორი ადამიანი ემსხვერპლა.

უკრაინელმა ოფიციალურმა პირებმა ასევე განაცხადეს, რომ სამხრეთის საპორტო ქალაქ ოდესაში 20 ადამიანი დაშავდა, მათ შორის ორი ბავშვი.