პსჟ-ის ულტრასებმა მარსელში მგზავრობის აკრძალვა გაასაჩივრეს

ადგილობრივმა ხელისუფლებამ განაცხადა, რომ მგზავრობა გულშემატკივრებს შორის ძალადობრივი შეტაკებების საფრთხის გამო აკრძალა. ეს შეხვედრა საფრანგეთის ფეხბურთში ყველაზე დიდ მატჩად მიიჩნევა.

პსჟ-ის გულშემატკივართა გაერთიანება Collectif Ultras Paris-მა განაცხადა: „ჩვენ ჩვენს ადვოკატს ვთხოვთ, სახელმწიფო საბჭოში გადაუდებელი პროცედურა დაიწყოს, რათა მინისტრის მოსალოდნელი აკრძალვა გავასაჩივროთ“.

გაერთიანებამ დასძინა: „2015 წლიდან ექვსი პრეფექტი შეიცვალა, თუმცა ჩვენთან რეალური დიალოგი არცერთხელ გამართულა. თერთმეტწლიანი განმეორებითი აკრძალვები დიალოგს ვერ ჩაანაცვლებს“.

საფრანგეთში სტუმარი გუნდის გულშემატკივრებს მაღალი რისკის მატჩებზე დასწრებას რეგულარულად უკრძალავენ. პსჟ-ის გულშემატკივრების სარჩელი, სავარაუდოდ, ვერ დაკმაყოფილდება.

საფრანგეთის შინაგან საქმეთა სამინისტრომ აკრძალვა იმით დაასაბუთა, რომ მარსელისა და პსჟ-ის გულშემატკივრებს შორის ურთიერთობა მრავალი წელია მტრულია. სამინისტრომ 2018 წლის თებერვალში პარიზში მომხდარი ინციდენტებიც გაიხსენა. ეს ორივე გუნდის გულშემატკივრების მონაწილეობით გამართული ბოლო მატჩი იყო და მაშინ სამართალდამცავი უწყებების რვა თანამშრომელი დაშავდა.

პსჟ-ისა და მარსელის შეხვედრა „ლე კლასიკის“ სახელითაა ცნობილი. დაპირისპირება 1990-იან წლებში გახდა პოპულარული, როცა ორივე კლუბში ცნობილი ფეხბურთელების მისვლამ მეტოქეობა გაამწვავა. მარსელი 1993 წელს ჩემპიონთა ლიგის გამარჯვებული პირველი ფრანგული გუნდი გახდა. თუმცა 2011 წელს პსჟ-ის ყატარელი ინვესტორების მიერ შეძენის შემდეგ მარსელი მეტოქეს მნიშვნელოვნად ჩამორჩა. მიუხედავად ამისა, მატჩი კვლავ დიდ ვნებათაღელვას იწვევს.

ჩემპიონი პსჟ მარსელს ორი ქულით უსწრებს. მარსელს სირთულეები აქვს, რადგან ფინანსური შეზღუდვების გამო ზაფხულში ვერცერთი ახალი ფეხბურთელი ვერ დაიმატა.