რუსეთი: ბალტიის ქვეყნებში ნატოს ძალების დამატება ესკალაცია იქნება

საგარეო საქმეთა სამინისტროს პრესსპიკერმა მარია ზახაროვამ ჟურნალისტებს განუცხადა: „ბალტიის ქვეყნებში ნატოს დამატებითი კონტინგენტის, მათ შორის, აშშ-ის ძალების, შესაძლო განთავსებასა და შესაბამისი სამხედრო ინფრასტრუქტურის შექმნას ცალსახად ესკალაციად მივიჩნევთ“.

ზახაროვამ განაცხადა, რომ ამგვარი გეგმები ვაშინგტონის ადმინისტრაციას აქვს. მისი თქმით, ისინი ეწინააღმდეგება ადმინისტრაციის გაცხადებულ მიზანს, ხელი შეუწყოს ევროპაში დაძაბულობის განმუხტვის დიპლომატიური და პოლიტიკური გზების შექმნას.

ზახაროვამ თქვა: „ყველა ეს კონფრონტაციული ნაბიჯი ჩრდილოატლანტიკური ალიანსის გეგმებს შეესაბამება. ალიანსს რუსეთის დასავლეთ სასაზღვრო რეგიონების დაჩქარებული მილიტარიზაცია სურს. ამისთვის ის აღმოსავლეთიდან მომდინარე ე.წ. საფრთხის ცრუ საბაბს იყენებს, რაზეც დღეს უკვე ვისაუბრეთ“.

ზახაროვამ გაიმეორა, რომ რუსეთი დასავლეთ ევროპასთან შეიარაღებულ კონფლიქტს არ გეგმავს. მან აღნიშნა, რომ რუსეთის პრეზიდენტ ვლადიმერ პუტინსა და საგარეო საქმეთა მინისტრ სერგეი ლავროვს მსგავსი განცხადებები არაერთხელ გაუკეთებიათ.

ზახაროვამ თქვა: „შეიძლება მათ ვკითხოთ, ვინც ასეთ რამეებს ამბობს ან, სულ მცირე, მათი მნიშვნელობის ახსნა შეუძლია, როგორ ასაბუთებენ ამ ფანტაზიებს. რას ასახელებენ მათ მიერ შეთხზული ქმედებების მიზნებად, ამოცანებად ან მიზეზებად?“

ზახაროვამ ევროკავშირიც დაადანაშაულა რუსეთთან „კონფრონტაციის გზის“ არჩევაში. მისი მტკიცებით, ეს გზა „ევროპის პრობლემებს მხოლოდ გაამწვავებს“.

ზახაროვამ გერმანია რუსეთ-უკრაინის ომში კიევის მხარედ დაასახელა. მან გერმანიის ამჟამინდელი მთავრობა ომისკენ სწრაფვაში დაადანაშაულა და კანცლერ ფრიდრიხ მერცის უკრაინაში ბოლო ვიზიტი მოიშველია.

მერცი უკრაინის დედაქალაქს შაბათ-კვირას ეწვია და კიევისთვის დამატებით 1 მილიარდი ევროს (1,1 მილიარდი დოლარი) სამხედრო დახმარება გამოაცხადა.