რუსეთი უკრაინას დაესხა თავს, დარტყმები კიევსა და ოდესასაც შეეხო

რუსეთის თავდაცვის სამინისტროს ცნობით, ღამით საჰაერო თავდაცვამ 592 უკრაინული დრონი მოიგერია. დრონები რუსეთის 18 რეგიონის, მათ შორის მოსკოვის რეგიონის, ასევე ოკუპირებული ყირიმისა და შავი ზღვის აკვატორიის თავზე დაფიქსირდა. ამასობაში რუსეთის რკინიგზამ (Российские железные дороги) განაცხადა, რომ მოსკოვსა და ქალაქ ტოლიატის შორის მოძრავი სამგზავრო მატარებლის ლოკომოტივი და პირველი ვაგონი დაზიანდა. მიზეზად დაუზუსტებელი გარე ჩარევა დასახელდა. რუსეთის რკინიგზამ, რომლის განცხადებასაც TASS ავრცელებს, აღნიშნა: „წინასწარი ინფორმაციით, მემანქანე დაშავდა, თუმცა ყველა მგზავრი უვნებელია“. დღეს დილით ოდესაზე რუსეთის თავდასხმის შედეგად ერთი ადამიანი დაიღუპა, მეორე კი დაშავდა. Ukrinform-ის ცნობით, ამის შესახებ ოდესის სამხედრო ადმინისტრაციის ხელმძღვანელმა სერჰი ლისაკმა Telegram-ზე განაცხადა. ლისაკმა დაწერა: „მტერი ქალაქს თავს დაესხა. კერძო საცხოვრებელი შენობები დაზიანდა“. მისი თქმით, რუსეთის თავდასხმას ერთი ადამიანი ემსხვერპლა. კიდევ ერთი დაშავებული საავადმყოფოში გადაიყვანეს. მისი მდგომარეობა საშუალო სიმძიმისაა. ინფრასტრუქტურაც დაზიანდა.

დღეს დილით რუსული დრონები ზაპოროჟიეს თავს დაესხნენ. ორი ადამიანი დაშავდა, სამედიცინო ცენტრში ხანძარი გაჩნდა, შენობები და სატრანსპორტო საშუალებები კი დაზიანდა. Ukrinform-ის ცნობით, ამის შესახებ ზაპოროჟიეს ოლქის თავდაცვის საბჭოს თანათავმჯდომარემ ივან ფედოროვმა Telegram-ზე განაცხადა. ფედოროვის თქმით, სამედიცინო ცენტრის შენობა დაზიანდა და ხანძარი გაჩნდა. რუსებმა სასწრაფო სამედიცინო დახმარების ავტომობილებსაც დაარტყეს. მაშველებმა სამედიცინო პერსონალთან ერთად სხვადასხვა სართულიდან შვიდი პაციენტი გაიყვანეს. მათ შორის გადაადგილების შეზღუდული შესაძლებლობის მქონე პირებიც იყვნენ. მათ საავადმყოფოს ერთ-ერთ განყოფილებაში გაჩენილი ხანძარიც ჩააქრეს. სხვა ადგილებში მრავალსართულიანი შენობები, ავტოფარეხები, ავტომობილები და გზის საფარი დაზიანდა.

25 სექტემბრის დილით კიევის პეჩერსკის რაიონზე რუსული დრონებით თავდასხმის შედეგად ერთი ადამიანი დაიღუპა და რამდენიმე დაშავდა. დაღუპული 14 წლის ბიჭია. Ukrinform-ის ცნობით, ინფორმაცია კიევის საქალაქო სამხედრო ადმინისტრაციამ Telegram-ზე გაავრცელა. უკრაინის პოლიციის წყაროებზე დაყრდნობით, ადგილობრივი მედიასაშუალებები იტყობინებიან, რომ დრონი დედაქალაქის ცენტრში მდებარე საცხოვრებელ რაიონში 16-სართულიან შენობას მოხვდა. მოზარდის გარდა, სულ მცირე შვიდი ადამიანი დაშავდა.

რუსეთი უკრაინის კომპიუტერული ქსელის ინფრასტრუქტურას უტევს. თუმცა ინტერნეტარხების ფართო გავრცელების გამო ქვეყანა კავშირის გარეშე მთლიანად არ დარჩება. Ukrinform-ის ცნობით, ამის შესახებ პრეზიდენტ ვოლოდიმირ ზელენსკის ტექნოლოგიურ საკითხებში არაფორმალურმა მრჩეველმა და დარგის ექსპერტმა სერჰი „ფლეშ“ ბესკრესტნოვმა Facebook-ზე დაწერა. ფლეშმა აღნიშნა: „რუსები ჩვენი კომპიუტერული ქსელის ინფრასტრუქტურას უტევენ. თუმცა უკრაინა ინტერნეტარხების ყველაზე ფართო გავრცელების მქონე ქვეყანაა. ამიტომ მთელი ქვეყანა, რეგიონები და ქალაქები, ინტერნეტის გარეშე არ დარჩება“.