რუსეთის დარტყმას კიევის საოფისე შენობაში სულ მცირე ოთხი ადამიანი ემსხვერპლა

კიევის მერმა ვიტალი კლიჩკომ განაცხადა, რომ რუსეთმა სოლომიანსკის რაიონში საოფისე შენობას დრონით დაარტყა. დარტყმას სულ მცირე ოთხი ადამიანი ემსხვერპლა.

კლიჩკოს თქმით, სულ მცირე სამი დაღუპულის ცხედარი დრონით დაზიანებული შენობის გვერდით მდებარე ავტოსადგომზე იპოვეს. კიდევ შვიდი ადამიანი დაშავდა, მათ შორის ერთი ბავშვი. შენობის ფასადი დაზიანდა, ფანჯრები კი ჩაიმსხვრა.

სოლომიანსკის რაიონში სამედიცინო დაწესებულებაც დაზიანდა. მიმდებარე ტერიტორიიდან სამი ადამიანი საავადმყოფოში გადაიყვანეს.

დარტყმამ ინტერნეტპროვაიდერ DataGroup-ის მონაცემთა ცენტრიც დააზიანა. კომპანიამ განაცხადა, რომ მისი არცერთი თანამშრომელი არ დაშავებულა. კომპანიის ცნობით, მომხმარებელთა მონაცემები ხელუხლებელია და ყველა მომსახურება სარეზერვო ობიექტებიდან უწყვეტად მუშაობს.

ვოლოდიმირ ზელენსკიმ თქვა, რომ იმავე დღეს რუსეთის ძალებმა დრონებით McDonald’s-ის საწყობსაც დაარტყეს. ზელენსკიმ დაწერა: „მოიერიშე დრონი ჩვეულებრივი საქონლის წინააღმდეგ. რუსები ესკალაციის ოპერაციას მუდმივად აფართოებენ: ამერიკული და სხვა კომპანიები, მონაცემთა ცენტრები, ინტერნეტპროვაიდერები. რუსეთისთვის მთელი ჩვეულებრივი ცხოვრება უბრალოდ სამიზნეა“.

კლიჩკოს თქმით, მთლიანობაში 25 სექტემბერს კიევზე რუსეთის დარტყმებს ხუთი ადამიანი ემსხვერპლა და 31 დაშავდა. დაშავებულთაგან 15 საავადმყოფოში მკურნალობს, მათ შორის ორი ბავშვი.