რუსეთის დარტყმებმა უკრაინის სამი უდიდესი ფოლადის ქარხანა გააჩერა

რუსეთმა სექტემბრის დასაწყისში ქარხნებს ბალისტიკური რაკეტებით დაარტყა. დარტყმები ზაპოროჟიესა და დნიპროპეტროვსკის რეგიონებში მდებარე ობიექტებს მოხვდა. ორი ქარხანა მეტალურგიულ და სამთო კომპანიას, „მეტინვესტს“ (Metinvest), ეკუთვნის. მესამე კომპანია „არსელორმიტალის“ (ArcelorMittal) ქარხანაა. თავდასხმებმა 17 მუშა იმსხვერპლა.

„მეტინვესტის“ აღმასრულებელი დირექტორის ოფისის ხელმძღვანელმა ოლექსანდრ ვოდოვიზმა (Oleksandr Vodoviz) ფაინენშალ ტაიმსს განუცხადა: „დღეის მდგომარეობით, უკრაინას ფოლადის ინდუსტრია აღარ აქვს“. მისი თქმით, რუსეთის ძალებმა „ზუსტად იცოდნენ, სად დაერტყათ“ და ქარხნების ბრძმედები ამოიღეს სამიზნედ.

„მეტინვესტისა“ და „არსელორმიტალის“ განცხადებით, მათ ქარხნებზე უკრაინის ფოლადის წარმოების 90% მოდის. ვოდოვიზის თქმით, ამ ობიექტებზე 15 000-ზე მეტი ადამიანი მუშაობს. წარმოების შეჩერებამ შეიძლება ეკონომიკის სხვა სექტორები და საგადასახადო შემოსავლები სერიოზულად დააზიანოს. მან დასძინა: „ამჟამად არ ვიცით, შეკეთებას რამდენი დრო დასჭირდება, დღეები, კვირები, თვეები თუ წლები“.

რუსეთის შეიარაღებული ძალები სრულმასშტაბიანი ომის დაწყებიდან უკრაინის სარკინიგზო ინფრასტრუქტურას, ქარხნებს, საწყობებსა და სავაჭრო ცენტრებს ესხმიან თავს. ბოლო თვეებში დარტყმების ინტენსივობა გაიზარდა.

უკრაინის პრემიერ-მინისტრმა სერჰიი კორეცკიმ (Serhii Koretskyi) განაცხადა, რომ რუსეთის თავდასხმების გამო ქვეყანამ შეიძლება დაახლოებით 1,5 მილიარდი დოლარის საგადასახადო შემოსავალი დაკარგოს.

უკრაინის პრეზიდენტმა ვოლოდიმირ ზელენსკიმ მანამდე განაცხადა, რომ ქვეყნის სამხედრო საბიუჯეტო დეფიციტი 27 მილიარდ ევროს შეადგენს. მან მოკავშირეებს დამატებითი დაფინანსება სთხოვა. ნიუ-იორკ ტაიმსის ცნობით, აგვისტოში მისმა მოთხოვნამ ბევრი ევროპელი ოფიციალური პირი „გააკვირვა და შეაშფოთა“.