რუსეთის იერიშებს ხარკოვსა და კიევში ცხრა ადამიანი ემსხვერპლა

ყველაზე მეტი მსხვერპლი ხარკოვის რეგიონის სოფელ სტარა ჰნილიციაში მდებარე ფერმაში დაფიქსირდა. იერიშს შვიდი ადამიანი ემსხვერპლა, კიდევ 12 ადამიანი კი დაშავდა. უკრაინული მედიის ცნობით, ამის შესახებ ხარკოვის რეგიონის ხელმძღვანელმა ოლეჰ სინეჰუბოვმა განაცხადა.

დედაქალაქზე მასშტაბურმა სარაკეტო იერიშმა რამდენიმე შენობა დააზიანა. ორი ადამიანი დაიღუპა, სამი კი დაშავდა. დაზიანდა სამშობიაროც. ამის შესახებ უკრინფორმი (Ukrinform) იტყობინება. კიევის მერმა ვიტალი კლიჩკომ განაცხადა: „პოდილის რაიონში მდებარე სამშობიაროს, რომლის სიახლოვეს რაკეტის ნამსხვრევები ჩამოცვივდა, ფანჯრები და ფასადის ნაწილი დაუზიანდა. სამედიცინო დაწესებულებაში დაშავებულების შესახებ ინფორმაცია არ გავრცელებულა“. მან დასძინა: „ახლომდებარე ავტოსადგომზე ერთი ადამიანი დაიღუპა. დაზიანდა მეზობლად მდებარე კლინიკური დიაგნოსტიკის ცენტრიც“.

უკრინფორმმა ტელეგრამზე კიევის საოლქო სამხედრო ადმინისტრაციის განცხადება გაავრცელა. მის თანახმად, რუსეთის იერიშების შედეგად კიევის რეგიონში კიდევ რვა შენობა დაზიანდა, ერთი ადამიანი კი დაშავდა.

გავრცელებული ცნობით, რუსეთის იერიშები გუშინ, 23 სექტემბერს, მთელი დღე და ღამე გაგრძელდა. ბუჩის რაიონში ხუთი კერძო სახლი და ერთი ავტომობილი დაზიანდა. დაშავდა 1945 წელს დაბადებული ერთი ადამიანი. ფასტივის რაიონში ერთი სატრანსპორტო საშუალება დაზიანდა. ბორისპილის რაიონში კი ერთი კერძო სახლი დაზიანდა.

რუსეთის თავდაცვის სამინისტრომ განაცხადა, რომ რუსეთის შეიარაღებულმა ძალებმა გასულ ღამეს უკრაინაზე რაკეტებითა და დრონებით „მასშტაბური იერიში“ მიიტანეს. სამინისტროს თქმით, სამიზნეებს შორის კიევში სამხედროების მიერ გამოყენებული ორი სატელეკომუნიკაციო ცენტრი იყო. ოდესაში კი ორი ლოგისტიკური ცენტრი დაიბომბა, საიდანაც „ევროპული ქვეყნებიდან სამხედრო საქონელი“ შეჰქონდათ.

რუსეთის უწყებამ ტელეგრამის არხზე განმარტა, რომ უკრაინის დედაქალაქში „კიევსტარისა“ და „პარკოვის“ სატელეკომუნიკაციო ცენტრები დაზიანდა. სამინისტროს მტკიცებით, ისინი „უკრაინის შეიარაღებულ ძალებს საკომუნიკაციო მომსახურებითა და გამოთვლითი სიმძლავრით უზრუნველყოფენ“. ოდესის რეგიონში დაიბომბა „ორი ლოგისტიკური ცენტრი, სადაც ევროპული ქვეყნებიდან შემოტანილ სამხედრო და ორმაგი დანიშნულების საქონელს ინახავდნენ და ანაწილებდნენ“. რუსეთის ძალებმა ჩორნომორსკის პორტში ასევე დაბომბეს მცურავი „ნავთობმზიდი, რომელსაც უკრაინის შეიარაღებული ძალებისთვის განკუთვნილი საწვავი და საპოხი მასალები გადაჰქონდა“.

უკრაინის პრეზიდენტმა ვოლოდიმირ ზელენსკიმ ტელეგრამზე დაწერა: „დღეს რუსებმა კიევზე სარაკეტო იერიში სწორედ მაშინ მიიტანეს, როცა კონგრესის წევრებთან ლინდსი გრემის კანონპროექტსა და სანქციების გამკაცრების საჭიროებას განვიხილავდით. რუსეთი ზეწოლის გარეშე ამ ომს არ დაასრულებს“.