რუსეთმა ცხრა გასამართლებული ICC-ის მაღალჩინოსნის ექსტრადიცია მოითხოვა

რუსეთის გენერალურმა პროკურატურამ ხუთშაბათს განაცხადა, რომ მათი დაკავებისა და ექსტრადიციის მოთხოვნები „არაერთ სხვა ქვეყანასაც“ გაუგზავნა. მოთხოვნა ICC-ის პრეზიდენტ ტომოკო აკანესაც ეხება.

მოსკოვის საქალაქო სასამართლომ 2025 წლის დეკემბერში ცხრავე პირი დაუსწრებლად ცნო დამნაშავედ. ბრალდებები მოიცავდა უდანაშაულო პირის შეგნებულად სისხლისსამართლებრივ პასუხისგებაში მიცემას, უკანონო დაკავებასა და საერთაშორისო დაცვით მოსარგებლე პირებზე ან დაწესებულებებზე თავდასხმას. მათ სამ-ნახევრიდან 15 წლამდე პატიმრობა მიუსაჯეს.

2023 წელს ICC-მ რუსეთის პრეზიდენტ ვლადიმერ პუტინსა და ბავშვთა უფლებების საკითხებში პრეზიდენტის რწმუნებულ მარია ალექსეევნა ლვოვა-ბელოვაზე დაკავების ორდერები გასცა. მათ უკრაინაში სავარაუდო ომის დანაშაულებს ედავებიან.

ეს ნაბიჯი აშშ-ის მიერ ICC-ის მაღალჩინოსნებისთვის, მათ შორის იაპონიის მოქალაქე აკანესთვის, სანქციების დაწესების ფონზე გადაიდგა. აშშ-მა ივლისში დაიწყო „კამპანია აშშ-ის სუვერენიტეტისთვის სისხლის სამართლის საერთაშორისო სასამართლოსგან შექმნილი საფრთხის აღმოსაფხვრელად“. სასამართლომ 2020 წელს ავღანეთში აშშ-ის სამხედრო მოსამსახურეთა მიერ სავარაუდოდ ჩადენილი დანაშაულების გამოძიება დაამტკიცა.

იაპონიამ პარასკევს რუსეთის პროკურატურის მოთხოვნები დაგმო. სააგენტო კიოდო ნიუსის (Kyodo News) ცნობით, მთავრობის პრესსპიკერმა მასანაო ოძაკიმ განაცხადა, რომ ეს ზომები „დაუსაბუთებელი და მიუღებელია“.

ოძაკიმ დასძინა, რომ მთავრობა აპირებს, „სათანადო რეაგირება მოახდინოს, მათ შორის რუსეთისთვის დამატებითი მოთხოვნების წარდგენით“. მთავრობა ასევე აპირებს, „ICC-სა და მონაწილე სხვა სახელმწიფოებთან კომუნიკაცია შეინარჩუნოს“.

იაპონია რომის სტატუტის მონაწილე სახელმწიფოა. ამ სტატუტით სასამართლო 2002 წელს შეიქმნა, თუმცა რუსეთი და აშშ მისი მონაწილეები არ არიან.