რუსეთში მყოფი ესპანელი მასწავლებელი მოქალაქეებს რუსეთის ჯარში გაწევრიანებისკენ მოუწოდებს

ეს არ არის ერთადერთი შემთხვევა, როცა მან შეიარაღებული ძალებისა თუ უსაფრთხოების სამსახურების წევრების ვინაობა გაავრცელა. 29 ოქტომბერს მან ესპანეთის არმიის მოქმედი ქვემოფიცრის სახელი, ფოტო და საქმიანობის ისტორია გამოაქვეყნა. მისი არხი კრემლის საწინააღმდეგო პოზიციების გამომხატველი ადამიანების დაშინებითაც არის დაკავებული. ის რუსი კიბერმეკობრეების განცხადებებს ესპანურად თარგმნის და მათი თავდასხმების მტკიცებულებებს აქვეყნებს.

ანგარიშში, სახელწოდებით „უხილავი არსენალი: ჰიბრიდული საფრთხეები ესპანეთის 2026 წლის არჩევნებისა და ეროვნული უსაფრთხოებისთვის“, ნათქვამია, რომ მოსკოვის მიერ დაცული ეს მასწავლებელი ტელეგრამის არხების ქსელის ცენტრალურ კვანძს მართავს. ეს არხები რუსული ოფიციალური წყაროების, მათ შორის პორტალ „სპუტნიკის“, სააგენტო „ტასისა“ და პროპაგანდისტული არხ „რიბარის“ მასალებს ესპანურად ავრცელებენ. ქსელში კრემლთან დაახლოებული ბლოგერების პოსტებიც ქვეყნდება. ანგარიშის თანახმად, პრორუსულ არხებს, რომლებიც მასალებს ერთდროულად აქვეყნებენ ან ერთმანეთს უზიარებენ, ჯამში 350 000 გამომწერი და 8,5 მილიონი ნახვა ჰყავდათ 16 დღეში.

ქსელი, სხვა საკითხებთან ერთად, ავრცელებს მოსაზრებას, რომ ესპანეთისთვის მთავარ საფრთხეს ისრაელი, აშშ, მაროკო და ნატო წარმოადგენენ. ის ასევე ამტკიცებს, რომ უკრაინისთვის იარაღის მიწოდების გამო ესპანეთი თავდასხმების სამიზნეა. ურდას სარკინიგზო ავარიიდან სულ რაღაც 36 წუთში დაიწყო ცრუ ინფორმაციის გავრცელება, თითქოს კატასტროფა საბოტაჟის შედეგი იყო. ყალბი სარკინიგზო ანგარიშებისა და მედიის სახელით მოქმედი გვერდების წყალობით, ეს ინფორმაცია განსაკუთრებული სისწრაფით გავრცელდა.

რუსეთთან დაკავშირებული ქსელის გარდა, Golden Owl-ის მკვლევრებმა გამოავლინეს ესპანურენოვანი Facebook-გვერდების დიდი ქსელი. გვერდებს ვიეტნამიდან მართავენ, ისინი ესპანურ გვერდებად ასაღებენ თავს და ჯამში დაახლოებით 270 000 მიმდევარი ჰყავთ. აუდიტორიის დიდი ნაწილი 65 წლის ან უფრო ასაკოვანია. ანგარიშის თანახმად, გვერდების გავრცელების გასაზრდელად მათ ფასიანი აუდიტორია დაიქირავეს. ეს საქმეს ვიეტნამური წარმოშობის მქონე მოქალაქეები აკეთებდნენ.

კვლევის თანახმად, 27 ოქტომბრიდან ამ გვერდებმა უწყინარი მასალების გავრცელება შეწყვიტეს და ხელოვნური ინტელექტით შექმნილ, ანტისამთავრობო და ისლამოფობიურ საარჩევნო ისტორიებზე გადავიდნენ. „კვლევა აჩვენებს ორგანიზებულ ოპერაციას, რომელსაც შეუძლია საზღვარგარეთ ისეთი აუდიტორიის შექმნა, რომელიც ესპანურად გამოიყურება, და შემდეგ მისი არჩევნებთან დაკავშირებული მანიპულაციისკენ მიმართვა“, ნათქვამია ანგარიშში. ვიეტნამური ქსელი, რომელშიც რვა გვერდია გაერთიანებული, ყველაზე დიდია, თუმცა ერთადერთი არ არის. შრი-ლანკაში, ინდონეზიაში, პაკისტანსა და არგენტინაში განთავსებული არხებიც ესპანურებად ასაღებენ თავს. აშშ-იდან, საფრანგეთიდან და გერმანიიდან მოქმედმა 25 დაკავშირებულმა ანგარიშმა სეუტის კრიზისთან დაკავშირებული ერთნაირი ჰეშთეგებით 1,39 მილიონი ნახვა დააგროვა.

ანგარიშში აღწერილი ერთ-ერთი ოპერაცია ესპანეთში ბრაზილიის არჩევნების სავარაუდო გაყალბების შესახებ ნარატივის გადატანას ეხებოდა. ეს ნარატივი ლათინურ ამერიკაში ულტრამემარჯვენე ვებგვერდებმა, მათ შორის „ლა დერეჩა დიარიომ“ და UHN Plus-მა, გაავრცელეს. ეს გვერდები ბიზნესმენ ხავიერ ნეგრესთან არიან დაკავშირებული. ნარატივი ნახევარ საათზე ნაკლებ დროში ესპანურ კონტექსტს მოარგეს, რათა 29 ნოემბრის არჩევნების წინ საარჩევნო სისტემის მიმართ უნდობლობა გაეღვივებინათ.

ანგარიშის მიხედვით, ოთხმა სხვადასხვა ანგარიშმა ერთი და იგივე ტექსტი, ერთნაირი თანმიმდევრობით, მხოლოდ ცხრა წამის შუალედით გაავრცელა. ეს, როგორც ანგარიშშია ნათქვამი, „საერთო სცენარის მიხედვით მომუშავე ჯგუფზე მიუთითებს“. მიზანი იყო, ფოსტით მიცემული ხმების სავარაუდო გაყალბებისთვის მიეწერათ ნებისმიერი შედეგი, რომელიც გაზეთ „ელ მუნდოს“ გამოკითხვისგან განსხვავებული იქნებოდა. გამოკითხვა 29-ის არჩევნებში სახალხო პარტიისა და „ვოქსის“ აბსოლუტურ უმრავლესობას წინასწარმეტყველებდა. ამ მოსაზრებას ხელოვნური ინტელექტით შექმნილი სურათებიც ამყარებდა, მათ შორის ფოსტის თანამშრომლის გამოსახულება, რომელიც საარჩევნო ბიულეტენებს ანადგურებდა. „გაანალიზებული ყველა სტრუქტურა ერთ გზავნილში იყრის თავს, რომელსაც სამი ვარიანტი აქვს: ფოსტით ნუ მისცემ ხმას, ამომრჩეველთა სია გაყალბებულია, შედეგს მოიპარავენ“, ნათქვამია ანგარიშში. ანგარიშის განმარტებით, ეს გზავნილი ქვეყნის შიგნით გაჩნდა, თუმცა უცხოური ქსელები მის გავრცელებას აძლიერებენ.

ანგარიშის ავტორები აღნიშნავენ, რომ „29 ნოემბერს სადავო შედეგს შეეგებება საინფორმაციო გარემო, რომელშიც შიდა და უცხოურმა ჯგუფებმა უარყოფისთვის წინასწარ მოამზადეს საფუძველი“. მათ ამ გზავნილის გასაძლიერებლად მზადმყოფი არხებიც აქვთ. ანგარიში ასევე აფრთხილებს, რომ ბნელ ვებში ესპანეთის მოქალაქეების 13 მილიონზე მეტი ჩანაწერი და 113 000 ელფოსტისა და პაროლის წყვილი იყიდება. მონაცემები ძველი ჰაკერული თავდასხმებიდანაა მოპოვებული, თუმცა მათი გამოყენება დეზინფორმაციულ კამპანიებში, პიროვნების გასასაღებლად, შესაძლებელია.

მკვლევრები ხაზს უსვამენ, რომ ანგარიშში აღწერილი ყველა საქმიანობა ერთი და იმავე ოპერაციის ნაწილი არ არის. თუმცა, მათი თქმით, ეს შემთხვევები „აჩვენებს იმ მეთოდებისა და მოქმედი პირების მრავალფეროვნებას, რომლებსაც ესპანეთის პოლიტიკურ გარემოზე გავლენის მოხდენა შეუძლიათ“. „უშუალო შეშფოთება უკვე დოკუმენტირებულ მანიპულაციას სცდება“, აფრთხილებს ანგარიში. მასში ნათქვამია, რომ „ჩამოყალიბებულ ქსელებსა და ნარატივებს შეუძლიათ გამოიყენონ ფოსტით ხმის მიცემისთვის დარჩენილი დრო, არჩევნების ღამე და არჩევნების მომდევნო დღისთვის უკვე დაგეგმილი მობილიზაცია“, იმის მიხედვით, თუ რა შედეგს აჩვენებს კენჭისყრა.

თემებიენრიკე არიას გილიხავიერ ნეგრეGolden OwlNoName057(16)ევროპოლიელ მუნდოლა დერეჩა დიარიორიბარისპუტნიკიტასი

გამოქვეყნდა 7 ნოემბერი, 2026