რუსული ოქროს ნაკადი ჰონკონგში რეკორდულად გაიზარდა

ძვირფას ლითონებში საინვესტიციო კომპანია BullionVault-ის ანალიზის თანახმად, 2026 წლის პირველ შვიდ თვეში ჰონკონგმა რუსული წარმოშობის 112,7 ტონა ოქრო შეიტანა. კომპანია ჰონკონგის აღწერისა და სტატისტიკის დეპარტამენტის მონაცემებს დაეყრდნო.

იმპორტმა უკვე გადააჭარბა 2025 წლის სრულ მაჩვენებელს, როცა ჰონკონგმა რეკორდული 92,1 ტონა შეიტანა. 2021 წელს, უკრაინაში რუსეთის შეჭრამდე, ეს მაჩვენებელი მხოლოდ 3,3 ტონა იყო.

ანალიტიკოსებმა სი-ენ-ბი-სის განუცხადეს, რომ მკვეთრი ზრდა რუსეთის ოქროთი ვაჭრობის ახალ მიმართულებას აჩვენებს. 2022 წელს უკრაინაში შეჭრის შემდეგ რუსეთის მწარმოებლებს დასავლეთის ძირითადი ბაზრები დაეხურათ.

რუსულ ძვირფას ლითონზე წელს, პირველ შვიდ თვეში, ჰონკონგის არასავალუტო ოქროს იმპორტის თითქმის 15% მოდიოდა. 2021 წელს ეს წილი მხოლოდ 0,6% იყო.

Gatehouse Advisory Partners-ის უფროსმა კონსულტანტმა ვიტა სპივაკმა თქვა: „სრულმასშტაბიანი შეჭრის შემდეგ ჰონკონგი რუსეთ-ჩინეთის ვაჭრობის მნიშვნელოვან ცენტრად იქცა“. მან სი-ენ-ბი-სის განუცხადა: „ოქროს უმეტესი ნაწილი კონტინენტურ ჩინეთში მიდის, რადგან მას რუსულ ოქროზე სანქციები არ დაუწესებია“.

სპივაკმა აღნიშნა: „უშუალოდ ძვირფასი ლითონებისთვის ჰონკონგს სანქციებისთვის გვერდის ავლის გარდა სხვა უპირატესობებიც აქვს. ის მსოფლიოს უდიდეს ოქროს სამომხმარებლო ბაზარზე პირდაპირ წვდომას უზრუნველყოფს“.

ლონდონის ძვირფასი ლითონების ბაზრის ასოციაციამ (London Bullion Market Association) 2022 წლის მარტში რუსული ოქროსა და ვერცხლის გადამმუშავებელი ექვსივე საწარმო Good Delivery-ის სიებიდან ამოიღო. შემდეგ აშშ-მა, გაერთიანებულმა სამეფომ და დასავლეთის სხვა ქვეყნებმა რუსულ ოქროზე შეზღუდვები დააწესეს. შედეგად, რუსეთს ფაქტობრივად დაეხურა ბაზრები, რომლებიც მანამდე მისი ძვირფასი ლითონის ძირითადი დანიშნულების ადგილები იყო.

ომამდე რუსეთის ოქროს ინდუსტრია ლონდონზე ძლიერ დამოკიდებული გახდა. BullionVault-ის მონაცემებით, 2019-2021 წლებში გაერთიანებულ სამეფოში გატანილი რუსული ოქროს მოცულობა ქვეყნის საბადოებიდან მოპოვებული ოქროს დაახლოებით ორ მესამედს უტოლდებოდა.

BullionVault-ის კვლევების დირექტორმა ადრიან ეშმა თქვა: „ჰონკონგის ოფიციალური მონაცემები რუსული ოქროს იმპორტის მკვეთრ ზრდას ნათლად აჩვენებს. ეს ასახავს იმ მხარდაჭერასა და ორმხრივ ვაჭრობას, რომლისთვისაც პუტინმა სის არაერთხელ გადაუხადა მადლობა“.

ეშმა დასძინა: „რა თქმა უნდა, გაერთიანებულ სამეფოსა და სანქციების დამწესებელ დასავლეთის სხვა ქვეყნებში რუსული ოქროს ექსპორტი ჩამოიშალა“.

ჰონკონგი ბუნებრივი ალტერნატივაა. ქალაქი დიდი ხანია კონტინენტურ ჩინეთში ძვირფასი ლითონის შესასვლელი კარიბჭეა. ჩინეთი მსოფლიოში ოქროს უდიდესი მომხმარებელია. ჰონკონგი შენახვის, ანგარიშსწორებისა და ვაჭრობის ინფრასტრუქტურას სწრაფად აფართოებს.