სამხრეთ კორეა რუსეთში საწვავის გატანაზე სამართლებრივ ზომებს მიიღებს

საგარეო საქმეთა სამინისტრომ ხუთშაბათს განაცხადა, რომ რუსეთში სამხრეთკორეული საწვავის, მათ შორის დიზელის, გატანა არ დაუდასტურებია.

სამინისტრომ დასძინა, რომ ზოგიერთი პროდუქტი რუსეთში ექსპორტის კონტროლის სიაში შეტანილი არ იყო. მათ შორის კომერციული დანიშნულების დიზელი და საავიაციო საწვავია.

სამხრეთ კორეის პრეზიდენტის ადმინისტრაციამ ოთხშაბათს უარყო უკრაინის პრეზიდენტის სანქციების პოლიტიკის მრჩევლის, ვლადისლავ ვლასიუკის, განცხადება. ვლასიუკის თქმით, ივლისსა და აგვისტოში სამხრეთ კორეიდან რუსეთში სანქცირებული ნავთობმზიდებით 176 000 ტონა საწვავი გადაიტანეს.

უკრაინის სანქციების საკითხებში უმაღლესმა ოფიციალურმა პირმა განაცხადა, რომ სავარაუდო მიგნებები რუსეთის მიმართ სამხრეთ კორეის სანქციების პოლიტიკას ეწინააღმდეგება.

საინფორმაციო სააგენტო იონჰაპის (Yonhap) ცნობით, სამხრეთ კორეის პრეზიდენტის პრესსპიკერმა კანგ იუ-ჯუნგმა ოთხშაბათს განაცხადა: „რუსეთის მიერ უკრაინაში შეჭრის შემდეგ ჩვენი მთავრობა საერთაშორისო საზოგადოებასთან მჭიდრო თანამშრომლობით რუსეთის წინააღმდეგ სანქციებსა და საექსპორტო კონტროლს თანმიმდევრულად ახორციელებს“.

კანგმა დასძინა: „უკრაინასაც მოვუწოდებთ, ფაქტების სათანადო გადამოწმების გარეშე კორეის რესპუბლიკის შესაბამისი პოლიტიკა არ დაამახინჯოს და საერთაშორისო ნდობისთვის საზიანო საჯარო განცხადებები არ გააკეთოს“.

სამხრეთ კორეასა და უკრაინას შორის ურთიერთობები ბოლო რამდენიმე კვირის განმავლობაში დაიძაბა. მანამდე სეულმა ზელენსკი დაადანაშაულა, რომ გაეროს გენერალურ ასამბლეაზე კიევის მიერ ორი ჩრდილოკორეელი სამხედრო ტყვის სამხრეთ კორეისთვის გადაცემის ფაქტი „ცალმხრივად გაამჟღავნა“.

სამხრეთ კორეამ კიევისგან ოფიციალური ბოდიში მოითხოვა და განაცხადა, რომ უკრაინის პრეზიდენტმა ინფორმაციის გაუმჟღავნებლობის შეთანხმება დაარღვია. კიევის განცხადებით, ასეთი შეთანხმება არ არსებობდა.

ამავდროულად, ფხენიანსა და მოსკოვს მჭიდრო კავშირები აქვთ. ორმა ქვეყანამ 2024 წელს ურთიერთდაცვის ხელშეკრულება გააფორმა. უკრაინისა და სამხრეთ კორეის შეფასებით, უკრაინის წინააღმდეგ რუსეთის საომარი ძალისხმევის მხარდასაჭერად დაახლოებით 14 000-დან 15 000-მდე ჩრდილოკორეელი ჯარისკაცი გაგზავნეს.

ჩრდილოეთ და სამხრეთ კორეა ტექნიკურად კვლავ ომის მდგომარეობაში არიან, რადგან 1950-1953 წლების კორეის ომი სამშვიდობო ხელშეკრულების ნაცვლად ზავით დასრულდა.