საფრანგეთი ალიშერ უსმანოვისთვის სანქციების მოხსნას მხარს უჭერს

ევრონიუსის (Euronews) ცნობით, საფრანგეთმა სლოვაკეთის წინადადებას მხარი დაუჭირა, რომელიც რუსი ბიზნესმენისთვის, ალიშერ უსმანოვისთვის სანქციების მოხსნას ითვალისწინებს. გამოცემას ამის შესახებ ანონიმმა ევროპელმა დიპლომატებმა განუცხადეს.

ევროკავშირის სანქციები ყოველ ექვს თვეში ერთხელ ახლდება. მათი განახლების ამჟამინდელი ვადა 15 სექტემბერს იწურება. სლოვაკეთმა ევროკავშირს არაერთხელ მოუწოდა, ალიშერ უსმანოვი და მიხაილ ფრიდმანი სანქციების სიიდან ამოიღოს.

საფრანგეთმა განაცხადა, რომ პოლიტიკური კომპრომისის სახით უსმანოვის სანქციების სიიდან ამოღებას მხარს დაუჭერს. თუმცა, ევრონიუსის ცნობით, საფრანგეთის პოზიცია მოლაპარაკებებს, სავარაუდოდ, უფრო გაართულებს.

ევრონიუსის წყაროების თქმით, საფრანგეთის პოზიციამ ევროკავშირის სხვა ქვეყნებში „დიდი უკმაყოფილება“ გამოიწვია.

რამდენიმე დღის წინ კიდევ ერთმა რუსმა ბიზნესმენმა, რომან აბრამოვიჩმა, ევროკავშირის სასამართლოში სანქციების წინააღმდეგ შეტანილი მესამე სარჩელიც წააგო. აბრამოვიჩი სანქციების მოხსნას მოითხოვდა. ის ევროკავშირისგან არამატერიალური ზიანისთვის კომპენსაციასაც ითხოვდა.