საფრანგეთში ღვინის წარმოება 70-წლიან მინიმუმს უახლოვდება

ცვლილებების ეკონომიკური გავლენა სექტორსა და მთლიან ეკონომიკაზე შესაძლოა მნიშვნელოვანი იყოს. კარდებას თქმით, წლევანდელმა მოსავალმა საფრანგეთი ღვინის მწარმოებელ ქვეყნებს შორის მესამე ადგილზე შეიძლება გადაიყვანოს. 12-15 წლის წინ ქვეყანა იტალიას უსწრებდა და პირველ ადგილზე იყო, ახლა კი იტალია აშკარა ლიდერია, ხოლო საფრანგეთს ესპანეთმაც შეიძლება გაუსწროს.

კარდებამ აღნიშნა, რომ მესამე ადგილზე ჩამოსვლა წარმოების რეალურ პრობლემაზე მიუთითებს და საფრანგეთისა და კომპანიებისთვის პოტენციური შემოსავლის უზარმაზარ დანაკარგს ნიშნავს.

სექტემბრის დასაწყისში მთავრობამ საფრანგეთის ეკონომიკური ზრდის პროგნოზი 1%-დან 0,5%-მდე შეამცირა. მთავრობის შეფასებით, სიცხე და გვალვა წლევანდელ ზრდას 0,1 პროცენტული პუნქტით შეამცირებს.

ამასთან, ღვინის მეურნეობებში წარმოების ხარჯები მატულობს. კარდებას თქმით, ფულადი რესურსები ამოწურულია. კლიმატის გაუარესებასთან ერთად ინვესტირების შესაძლებლობა მცირდება, მიუხედავად იმისა, რომ მეტი ინვესტიციაა საჭირო. მისი შეფასებით, სექტორი მანკიერ წრეში ექცევა.

კარდებამ თქვა: „2019-2025 წლებში ღვინის სექტორში ბიზნესების გაკოტრების შემთხვევები გასამმაგდა. ვფიქრობ, ამ მხრივ 2026 წელიც შეიძლება ასეთივე კატასტროფული აღმოჩნდეს“.

ზაფხულის ბოლოს საფრანგეთის მთავრობამ სიცხით დაზარალებული ფერმერებისა და მევენახეებისთვის 1 მილიარდ ევროზე მეტი ღირებულების საგანგებო დახმარების გეგმა გამოაცხადა, რაც 1,15 მილიარდ დოლარს შეადგენს.

ადაპტაციისთვის საჭირო ინვესტიციებმა შესაძლოა სექტორის კონსოლიდაცია დააჩქაროს. კარდებამ ბოლო 25 წლის განმავლობაში მეურნეობების ზრდის მკაფიო ტენდენციაზე მიუთითა.

ლატურის თქმით, ხარისხისთვის გარკვეული მასშტაბია საჭირო, რადგან პერსონალში, აღჭურვილობასა და ინფრასტრუქტურაში ინვესტირება ძვირია. უფრო დიდ მეურნეობას ამ ხარჯების გაწევა უადვილდება. თუმცა ოჯახურ საკუთრებასა და მართვას დღეს წარსულთან შედარებით მეტად აფასებენ.

კლიმატური პრობლემები მაშინ გამწვავდა, როცა ღვინის მოხმარება უკვე მცირდება. ყოველდღიურად ღვინის მომხმარებელთა წილი 1960 წელს მოსახლეობის თითქმის 50%-ს შეადგენდა, 2018 წელს კი 10%-ზე ქვემოთ დაეცა. ბოლო 5 წლის განმავლობაში მაღალმა ინფლაციამ და საბაჟო ტარიფებმა ღვინის მარაგების დაგროვებასაც შეუწყო ხელი.

წარმოების შესამცირებლად მეურნეობები ვაზს ძირკვავენ. მხოლოდ ბორდოს რეგიონში 2023 წლიდან დაახლოებით 20 000 ჰექტარი ვაზი ამოძირკვეს, რის შემდეგაც ვენახების ფართობი 83 000 ჰექტარამდე შემცირდა.

2026 წელს მთავრობის მხარდაჭერის პროგრამით საფრანგეთის ვაზის დაახლოებით 4%-ს ამოძირკვავენ. ვაზის სამუდამოდ მოცილებისთვის მევენახეები თითო ჰექტარზე 4 000 ევროს, ანუ 4 590 დოლარს მიიღებენ.

კრიზისი სექტორის მთავარ წარმომადგენლებს ახალი ბაზრების, პროდუქტებისა და თაობების სწრაფად მოძიებას აიძულებს. კარდებამ მზა სასმელები და სრულიად განსხვავებული შეფუთვა დაასახელა. მისი თქმით, აშშ ახალი პროდუქტებით მომხმარებლების მოზიდვის შესამოწმებლად შესანიშნავი ბაზარია.

კარდებამ ახალი სავაჭრო შეთანხმებების ფონზე პერსპექტიულ ბაზრებად სამხრეთი ამერიკა, ბრაზილია და ინდოეთი დაასახელა. ლატურის აზრით, მნიშვნელოვანია ახალგაზრდა თაობაზე ორიენტაცია, უფრო შორეულ ბაზრებზე გასვლა და მაღალი ხარისხის ღვინის ფასის მხრივ უფრო ხელმისაწვდომად ქცევა. მეზონ ლუი ლატურისთვის სამხრეთი ამერიკა და ბრაზილია უკვე მნიშვნელოვანი ბაზრებია, ისევე როგორც ახალგაზრდა მოსახლეობის მქონე აფრიკა.

ლატური გამოწვევების მიუხედავად სექტორის მომავალს ოპტიმისტურად უყურებს. მისი თქმით, მეღვინეებმა ღვინის კონტექსტი, ადგილწარმოშობა და ისტორია მარტივად და ახალგაზრდა თაობისთვის გასაგებად უნდა ახსნან. ლატურის შეფასებით, თუ ხარისხი შენარჩუნდება და მომხმარებელი მის დაფასებას შეძლებს, სექტორს მიმზიდველი მომავალი ექნება.

თემებიფლორან ლატურიჟან-მარი კარდებამეზონ ლუი ლატურიINSEEC Grande Écoleშატო ლაფლერისაფრანგეთიბურგუნდიაბორდოშამპანიკლიმატის ცვლილება

გამოქვეყნდა 20 სექტემბერი, 2026