ევროკავშირში საწვავის რეკორდულმა ფასებმა საერთო გადასახადის მოთხოვნა გააჩინა

საწვავის უკიდურესად მაღალი ფასები საფრანგეთსა და იტალიაში უკვე მნიშვნელოვან შიდაპოლიტიკურ საკითხად იქცა. ორივე ქვეყანაში მომავალ წელს გადამწყვეტი არჩევნებია. სავარაუდოდ, ამომრჩეველთა მთავარი საზრუნავი ცხოვრების მკვეთრად გაზრდილი ღირებულება იქნება, რაც დიდწილად ენერგიის მაღალმა ფასებმა გამოიწვია.

იტალიაში პრემიერ-მინისტრ ჯორჯა მელონის მმართველმა მემარჯვენე კოალიციამ, რომელიც გამოკითხვებში მეტოქეებს ჩამორჩება, ამ კვირაში ახალი გეგმა წარადგინა. კოალიცია მომავალ წელს 14,5 მილიონ ავტომობილსა და მოტოციკლზე საგზაო გადასახადს გააუქმებს, რაც 2 მილიარდ ევროზე მეტი დაჯდება. ამას ემატება დიზელის აქციზის შემცირება, რომელიც უკვე 2,8 მილიარდი ევრო დაჯდა.

მელონიმ განაცხადა: „გადავწყვიტეთ, საწვავის გაძვირებასთან გასამკლავებლად გამოყენებული რესურსების ნაწილი მარტივი და სისტემური ღონისძიებისთვის მიგვემართა. ის განსაკუთრებით განკუთვნილია მათთვის, ვინც ავტომობილებსა და მოტოციკლებს ყოველდღე სამსახურში წასასვლელად, ბავშვების წასაყვანად ან გადასაადგილებლად იყენებს“.

საფრანგეთის პრეზიდენტმა ემანუელ მაკრონმა მინისტრებს განუცხადა, რომ საწვავის მიწოდებისა და ფასების საკითხში მთავრობის „სრული მობილიზება“ სურდა. ეს მოიცავს საერთაშორისო მომარაგების უზრუნველყოფის მცდელობებსაც, რისთვისაც ჰორმუზის სრუტის „მშვიდობიანი გახსნა“ უნდა მოხდეს.

პროტესტების ბოლო ტალღისას ფრანგმა მეთევზეებმა ხუთშაბათს სამხრეთ საფრანგეთში ორ პორტსა და საწვავის საწყობთან მისასვლელები გადაკეტეს. მიზეზი დიზელის მკვეთრი გაძვირება გახდა. ამ კვირაში მისმა ფასმა ლიტრზე 2,37 ევროს მიაღწია, რაც რეკორდულ 2,38 ევროზე ოდნავ ნაკლებია.

თევზჭერის მინისტრმა კატრინ შაბომ განაცხადა, რომ ექვსსაათიანი მოლაპარაკებების შემდეგ მეთევზეები ბლოკადების მოხსნას დათანხმდნენ. მათ დაჰპირდნენ, რომ ფულადი ნაკადების პრობლების მქონე პირები უპროცენტო სესხებს მიიღებენ, ხოლო დახმარების ზომები საწვავის ფასების ცვლილებებს დაუკავშირდება.

პრემიერ-მინისტრმა სებასტიენ ლეკორნიუმ ამ კვირაში სოფლის მეურნეობის, თევზჭერისა და მშენებლობის სექტორებისთვის საწვავის საგანგებო სუბსიდიები წლის ბოლომდე გაახანგრძლივა. თუმცა მთავრობას საწვავის ფასების ყველასთვის შესამცირებლად ჩარევა არ სურს.

საფრანგეთის ფინანსთა მინისტრმა როლან ლესკიურმა კვირის დასაწყისში ჟურნალისტებს განუცხადა: „საყოველთაო ზომები, რომლებიც ყველას, მათ შორის, მათაც ეხება, ვისაც ისინი არ სჭირდება, ცრუ ეკონომიაა. რატომ? იმიტომ, რომ საბოლოოდ მათი დაფინანსება მოგვიწევს“.

ესპანეთმა აგვისტოში დიზელზე საგადასახადო შეღავათი გააორმაგა და 1 სექტემბრიდან ლიტრზე 0,20 ევრომდე გაზარდა. გადაწყვეტილება ივლისში დიზელის ფასის 15,7%-ით ზრდას მოჰყვა. გერმანიაში კი ზეწოლის ქვეშ მყოფმა კანცლერმა ფრიდრიხ მერცმა პარასკევს გვიან საწვავის გადასახადის შემცირება გამოაცხადა.

მთავრობის განცხადებით, ბენზინსა და დიზელზე გადასახადი 1 ოქტომბრიდან წლის ბოლომდე 0,17 ევროთი შემცირდება. მთავრობა ნავთობის ინდუსტრიასთან მოლაპარაკებებსაც გამართავს, რათა საწვავის ფასის ზედა ზღვარი არაუგვიანეს 2027 წლის 1 იანვრისა შემოიღოს.

მერცმა განცხადებაში თქვა: „ყველა, ვინც ყოველდღიურად ავტომობილზეა დამოკიდებული, შესაძლებლობების ზღვარს უახლოვდება“. მან დასძინა: „ჩვენ ვაჩვენებთ, რომ კრიზისის მიმართ გამძლეები ვართ და ჩვენს მოქალაქეებს ვეხმარებით“.

მერცის მემარჯვენე-ცენტრისტული CDU ამ თვეში საქსონია-ანჰალტის რეგიონულ არჩევნებში ულტრამემარჯვენე AfD-სთან დიდი სხვაობით დამარცხდა. ამ შაბათ-კვირას კიდევ ორი რეგიონული არჩევნები გაიმართება, სადაც ულტრამემარჯვენე პარტია, სავარაუდოდ, კვლავ გაძლიერდება. პარტია იაფი რუსული გაზის იმპორტის აღდგენის მოთხოვნით აწარმოებს კამპანიას. ევროპამ ამ იმპორტზე დიდწილად უარი თქვა მას შემდეგ, რაც რუსეთი 2022 წელს უკრაინაში შეიჭრა.

თემებიემანუელ მაკრონივალდის დომბროვსკისიკატრინ შაბოლარს კლინგბაილიროლან ლესკიურისებასტიენ ლეკორნიუჯორჯა მელონიADACევროკავშირიევროკომისია

გამოქვეყნდა 19 სექტემბერი, 2026