ძლიერმა წვიმამ ქალაქს წყალდიდობის საფრთხე შეუქმნა

კვირას ძლიერმა წვიმამ სამხრეთ-დასავლეთის რამდენიმე რაიონში წყალმოვარდნა და სავალდებულო ევაკუაცია გამოიწვია. მათ შორისაა კოლორადოს ტურისტული ქალაქი, სადაც მოსახლეობა მთავარი მდინარის ისტორიულ ნიშნულამდე ადიდებას ელოდება. ჩვეულებრივ მშრალი რეგიონის მცხოვრებლებს კიდევ ერთმა ძლიერმა წვიმამ მოუსწრო.

კლდოვან მთებში მდებარე პაგოსა-სპრინგსის ხელისუფლებამ, სადაც 2 000-ზე მეტი ადამიანი ცხოვრობს და სათხილამურო კურორტები და ცხელი წყაროებია, მოსახლეობა მდინარე სან-ხუანის პოტენციურად კატასტროფული ადიდების შესახებ გააფრთხილა. პროგნოზით, კვირა გვიან ღამით მდინარის დონე 20 ფუტს (6,1 მეტრს) გადააჭარბებდა.

არჩულეტას ოლქის შერიფის ოფისმა Facebook-ზე დაწერა: „პროგნოზის მასშტაბის გასაგებად, 1911 წლის დამანგრეველი წყალდიდობის დროს, რომელმაც იმდროინდელი ქალაქი პაგოსა თითქმის მთლიანად გაანადგურა, მდინარე სან-ხუანის დონემ დაახლოებით 17,8 ფუტს მიაღწია. ეს პოტენციურად კატასტროფული წყალდიდობაა“.

ოლქის წარმომადგენლის, ვიკი შეფერის თქმით, კვირას მზის ჩასვლისას მდინარის დონე დაახლოებით 14 ფუტს აღწევდა. ქალაქში შესასვლელი და იქიდან გასასვლელი გზები ჩაკეტეს. იმ მცხოვრებლებს კი, რომლებსაც ევაკუაცია არ შეხებიათ, შინ დარჩენისკენ მოუწოდეს.

ამასობაში, ჩრდილოეთ ნიუ-მექსიკოსა და ცენტრალური არიზონის თემებშიც სავალდებულო ევაკუაცია გამოაცხადეს. წვიმის გამო რამდენიმე გზატკეცილიც დაიკეტა.

არიზონის თვალწარმტაც ქალაქ სედონაში ხელისუფლებამ ოუკ-კრიკის მახლობლად მცხოვრებლებს დაუყოვნებლივ წასვლისკენ მოუწოდა, რადგან ადიდებულმა წყალმა რამდენიმე ადამიანი საკუთარ სახლებში მოაქცია.

არიზონაში ორ დღეში რამდენიმე თვის ნალექს ელიან

მეზობელ იავაპაის ოლქსა და კემპ-ვერდის თემშიც მდინარეებისა და ნაკადულების მახლობლად მცხოვრებთათვის მსგავსი ევაკუაციის ბრძანებები გასცეს.

სედონიდან 100 მილზე (160 კმ-ზე) მეტით სამხრეთ-აღმოსავლეთით, გილას ოლქის ხელისუფლებამ ტონტო-კრიკის ნაპირზე მდებარე, რამდენიმე ასეული მცხოვრებისგან შემდგარი გისელას სრული ევაკუაცია ბრძანა. უამინდობამ ტუსონშიც გამოიწვია წყალმოვარდნა და მდინარის ადიდება. სედონიდან დაახლოებით 230 მილის დაშორებით მაშველებმა ნავებით სწრაფად გამოიყვანეს ადამიანები.

ტუსონში ამინდის ეროვნული სამსახურის მეტეოროლოგმა, აარონ ჰარდინმა თქვა: „ორიოდე დღეში ორი ან სამი თვის ნალექს ვიღებთ“.

კვირას არიზონის ქალაქ ფლაგსტაფში წვიმა თითქმის შეუჩერებლად მოდიოდა, დაიტბორა ადგილობრივი გზები და სანიაღვრე სისტემა წყლის ნაკადს ვეღარ უმკლავდებოდა. კვირა საღამოს პოლიციის განცხადების თანახმად, სამართალდამცველები ეძებდნენ კაცს, რომელიც სწრაფად მოძრავ წყალში ჩავარდა და „ზედაპირზე ამოსული აღარავის უნახავს“.