შავ ზღვაში დრონები ორ სავაჭრო გემს თავს დაესხნენ

ინფორმაცია პირველად საზღვაო გამოცემა maritime.bg-მ გაავრცელა. გამოცემის ცნობით, სავაჭრო გემები ქვეყნის ტერიტორიულ წყლებში გადაადგილდებოდნენ. მათ ბულგარეთის აღმოსავლეთით მდებარე ქალაქ ბიალიდან 148 კილომეტრში შეუტიეს.

ჩაძირული გემი ტოგოს დროშით დაცურავდა და მას თურქული სანაოსნო კომპანია მართავდა. ბულგარეთის პრემიერ-მინისტრმა რუმენ რადევმა დაადასტურა, რომ ეკიპაჟის ადგილსამყოფელი უცნობია. მეორე გემი პალაუს დროშით დაცურავდა და მისი მფლობელიც თურქული კომპანიაა. გემზე ხანძარი გაჩნდა, რის შედეგადაც სულ მცირე ორი ადამიანი მძიმედ დაშავდა. კონსტრუქციული დაზიანებების გამო ბულგარეთის ხელისუფლებამ ეკიპაჟის 18 წევრის ევაკუაცია განახორციელა.

ბულგარულმა ბორანმა ყველა მეზღვაური გადაარჩინა, რომელთაგან ზოგი დაშავდა. ისინი ქალაქ ვარნაში გადაჰყავთ. maritime.bg კიდევ ერთი შესაძლო გემის შესახებ იტყობინება, რომელსაც დაახლოებით 160 000 ტონა მარცვლეული გადაჰქონდა. თუმცა ბულგარეთის მთავრობამ მხოლოდ ორი გემის შესახებ გაავრცელა ინფორმაცია.

ბულგარეთის პრეზიდენტ ილიანა იოტოვას ადმინისტრაციამ ელექტრონული ფოსტით გავრცელებულ განცხადებაში ნატოს წევრ ქვეყანაში თავდასხმები დაადასტურა. ადმინისტრაციას დამატებითი დეტალები არ გაუვრცელებია. ამ დროისთვის პასუხისმგებელი მხარე უცნობია, მთავრობამ კი დამატებით კომენტარზე უარი თქვა.

რუმენ რადევმა ვითარების განსახილველად დღეს მთავარ სამინისტროებსა და უსაფრთხოების სამსახურებთან შეხვედრა მოიწვია.

ამ თავდასხმებამდე მხოლოდ ერთი დღით ადრე შავ ზღვაში დრონები კიდევ ერთ გემს დაესხნენ თავს, რის შედეგადაც ბორტზე ორი ადამიანი დაიღუპა. უკრაინის პრეზიდენტმა ვოლოდიმირ ზელენსკიმ ორშაბათს თავდასხმაზე პასუხისმგებლობა რუსეთს დააკისრა. დრონების იერიშს ორი ადამიანი ემსხვერპლა სატვირთო გემზე, რომელსაც რუმინეთის სანაპიროსთან მარცვლეული გადაჰქონდა.

უკრაინაში რუსეთის შეჭრის დაწყებიდან თითქმის ხუთი წელი გავიდა. მას შემდეგ ევროპის რამდენიმე ქვეყანამ თავის საჰაერო სივრცეში რუსული დრონების შეჭრა დააფიქსირა. შავ ზღვაში ასევე შენიშნეს მოდრეიფე ნაღმები. ამ ზღვაზე მნიშვნელოვანი სავაჭრო და ენერგეტიკული მარშრუტები გადის.