შვედეთის პრემიერ-მინისტრი არჩევნებში მარცხის შემდეგ გადადგა

შვედეთის პრემიერ-მინისტრი ულფ კრისტერსონი გადადგა. საყოველთაო არჩევნებში მისი მმართველი მემარჯვენე ბლოკი მემარცხენე-ცენტრისტულ ოპოზიციასთან მცირე სხვაობით დამარცხდა.

კრისტერსონმა გადაწყვეტილება ხუთშაბათს ნაშუადღევს X-ზე გამოქვეყნებულ პოსტში გამოაცხადა. კვირის არჩევნების წინასწარი შედეგებით, ორ ბლოკს დაახლოებით 50 000 ხმა აშორებდა. შვედეთის მოსახლეობა დაახლოებით 10 მილიონი ადამიანია.

სოციალ-დემოკრატების ლიდერის, მაგდალენა ანდერსონის ხელმძღვანელობით ოპოზიციური პარტიები შვედეთის 349-ადგილიან პარლამენტში, რიქსდაგში, სავარაუდოდ, 176 მანდატს მიიღებენ.

კონსერვატორ კრისტერსონს მთავრობაში ანტიიმიგრაციული, უკიდურესად მემარჯვენე შვედი დემოკრატები (SD) უჭერდნენ მხარს. გამარჯვების შემთხვევაში, კრისტერსონი მათ მინისტრთა კაბინეტში თანამდებობებს დაჰპირდა.

შვედეთის საარჩევნო უწყების (Swedish Election Authority) მონაცემებით, მისი მემარჯვენე ბლოკი რიქსდაგში, სავარაუდოდ, 173 მანდატს მიიღებს.

შედეგები უახლოეს დღეებში ოფიციალურად უნდა დამტკიცდეს. საბოლოო შედეგებს ამ კვირის ბოლოს ელიან.

შვედეთში ორი ძირითადი პოლიტიკური ბლოკია: ოთხი პარტია მემარჯვენე ბლოკშია, ოთხი კი მემარცხენეში. ამიტომ შვედებისთვის კოალიციური და უმცირესობის მთავრობები ჩვეულებრივი მოვლენაა.

პრემიერ-მინისტრის გადადგომის შემდეგ, რიქსდაგის სპიკერი ყველა პარტიასთან მოლაპარაკებებს მართავს და მომავალი პრემიერ-მინისტრობის კანდიდატს წარადგენს. შემდეგ კანდიდატს დეპუტატები კენჭს უყრიან.

კრისტერსონის განცხადებაში ნათქვამია: „ახლა სპიკერი უხელმძღვანელებს ახალი მთავრობის ფორმირების მომდევნო ეტაპს. ამით ვითხოვ პრემიერ-მინისტრის თანამდებობიდან გათავისუფლებას, რათა ეს სამუშაო დაუყოვნებლივ დაიწყოს“.

ანდერსონმა მთავრობის ფორმირებაზე მოლაპარაკებები სხვა ოპოზიციურ ძალებთან დაიწყო. მათ შორის არიან მემარცხენე პარტია, ცენტრის პარტია და მწვანეთა პარტია.

თუმცა, ისეთ საკითხებზე, როგორიც გადასახადებია, პარტიებს შორის მნიშვნელოვანი უთანხმოების გამო, მოლაპარაკებები შესაძლოა გაჭიანურდეს.

შვედეთში 2022 წლის არჩევნების შემდეგ მთავრობის ფორმირებას 37 დღე დასჭირდა, 2018 წელს კი 134 დღე.

კრისტერსონმა გადადგომისას განაცხადა, რომ ახალი მთავრობის შესაქმნელად ოპოზიციას „რთული“ პირობები ექნება. მისი თქმით, „დაბრკოლებები შესაძლოა არჩევნების დღემდე პარტიების მიერ გაკეთებულმა სხვადასხვა განცხადებამ შექმნას“.

მემარჯვენე ბლოკში კრისტერსონის ზომიერი პარტია, SD, ქრისტიან-დემოკრატები და ლიბერალები შედიან.