სი ძინპინი ბრიკსს ახლო აღმოსავლეთში მშვიდობისკენ მუშაობისკენ მოუწოდებს

ჩინეთის პრეზიდენტმა სი ძინპინმა განაცხადა, რომ ბრიკსმა ახლო აღმოსავლეთის კონფლიქტის მშვიდობიანი მოგვარებისთვის უნდა იმუშაოს. მან დასძინა, რომ ჩინეთი მზადაა, ამ პროცესში მნიშვნელოვანი როლი შეასრულოს.

სი ძინპინმა შაბათს, ნიუ-დელიში გამართულ ბრიკსის სამიტზე სიტყვით გამოსვლისას თქვა: „ახლო აღმოსავლეთსა და სპარსეთის ყურის რეგიონში ვითარება კვლავ რთულად ვითარდება. ამ კონფლიქტმა რეგიონის მოსახლეობას მძიმე ზარალი მიაყენა და საერთაშორისო საზოგადოების საერთო ინტერესებს არ შეესაბამება“.

ჩინეთის მთავრობის მიერ გამოქვეყნებული სიტყვის ჩანაწერის Google-ის თარგმანის თანახმად, სი ძინპინმა განაცხადა: „ყველა შესაბამისმა მხარემ პოლიტიკური გადაწყვეტის მიმართულება უნდა შეინარჩუნოს და მუდმივ, ყოვლისმომცველ ცეცხლის შეწყვეტას ხელი შეუწყოს. პრობლემების ძირეული მიზეზების აღმოფხვრას სათანადო მნიშვნელობა უნდა მივანიჭოთ“.

სი ძინპინმა დასძინა, რომ პალესტინის საკითხი ახლო აღმოსავლეთის პრობლემის ცენტრში ყოველთვის იდგა. მან ასევე ხაზი გაუსვა ისრაელთან ე.წ. „ორი სახელმწიფოს პრინციპზე დაფუძნებული გადაწყვეტის“ განხორციელების მნიშვნელობას.

სი ძინპინმა თქვა: „ჩინეთი მზადაა, ბრიკსის წევრებთან ერთად ახლო აღმოსავლეთსა და სპარსეთის ყურის რეგიონში მშვიდობისა და სიმშვიდის მისაღწევად სათანადო როლი შეასრულოს“.

ჩინეთი ირანის უდიდესი სავაჭრო პარტნიორი და თეირანის ენერგორესურსების ექსპორტის ერთ-ერთი მთავარი მომხმარებელია.

ტრამპის ადმინისტრაციამ გასულ თვეში ირანს მკაცრი ეკონომიკური სანქციების ახალი ტალღა დაუწესა. აშშ-ის ფინანსთა სამინისტროს ზომებს „ოპერაცია ეკონომიკური განდევნილი“ ეწოდა. მათი მიზანი ირანის ფინანსური კავშირების მთელ მსოფლიოში გაწყვეტაა.

აშშ-ის ფინანსთა მინისტრმა სკოტ ბესენტმა (Scott Bessent) ოპერაციის დაწყებისას მიანიშნა, რომ ჩინეთი გამონაკლისი არ იქნებოდა.

კონფლიქტის შემდეგ ენერგორესურსების ფასები მკვეთრად გაიზარდა. თუმცა, ეკონომისტების თქმით, ჩინეთმა ფასების კიდევ უფრო ზრდა შეაფერხა, რადგან წლების განმავლობაში მარაგებს აგროვებდა, შემდეგ კი ნავთობის შესყიდვები შეამცირა.

პრეზიდენტი დონალდ ტრამპი ამ თვის ბოლოს ჩინეთის ლიდერ სი ძინპინს თეთრ სახლში უმასპინძლებს.

ბრიკსი 2009 წელს დასავლეთის დომინირების საპირწონედ შეიქმნა. თავდაპირველად მასში ბრაზილია, რუსეთი, ინდოეთი, ჩინეთი და სამხრეთ აფრიკა შედიოდნენ. საბოლოოდ, გაერთიანებას ეგვიპტე, ეთიოპია, ინდონეზია, ირანი და არაბთა გაერთიანებული საამიროები შეუერთდნენ.