ტედი რინერის წინააღმდეგ რასისტულ შეურაცხყოფას იძიებენ

პარიზის პროკურატურამ რინერის ონლაინ შევიწროების გამოძიება დაიწყო

პარიზის პროკურატურამ ფრანგი ძიუდოისტის, ტედი რინერის წინააღმდეგ რასისტული შეურაცხყოფისა და ონლაინ შევიწროების გამოძიება დაიწყო. მანამდე სპორტსმენმა ულტრამემარჯვენეების გაძლიერების გამო შეშფოთება გამოთქვა.

რინერი ხშირად დაუსახელებიათ საფრანგეთის ყველაზე პოპულარულ სპორტსმენად. ის ყველა დროის ერთ-ერთი ყველაზე წარმატებული ძიუდოისტია. რინერმა ამ თვეში სატელევიზიო სპორტულ გადაცემაში თქვა, რომ საფრანგეთში ულტრამემარჯვენეების გაძლიერება „შფოთვას“ იწვევს. პროკურატურის ცნობით, ამის შემდეგ მას ინტერნეტში მრავალი რასისტული შეურაცხყოფა და სიძულვილის შემცველი შეტყობინება გაუგზავნეს.

იმიგრაციის მოწინააღმდეგე ულტრამემარჯვენე პარტიის, ეროვნული გაერთიანების (RN), პოლიტიკოს მარინ ლე პენს მომავალი გაზაფხულის საპრეზიდენტო არჩევნების წინ გამოკითხვებში მაღალი მხარდაჭერა აქვს.

საფრანგეთის საფეხბურთო ნაკრების კაპიტანი და რეალ მადრიდის მოთამაშე კილიან მბაპე მაისში კამათის ცენტრში აღმოჩნდა. მან შეშფოთება გამოთქვა, რომ ლე პენის პარტიამ შესაძლოა საპრეზიდენტო არჩევნებში გაიმარჯვოს.

37 წლის რინერი საფრანგეთის კარიბის კუნძულ გვადელუპაზე დაიბადა და პარიზში გაიზარდა. საფრანგეთში მას უამრავი გულშემატკივარი ჰყავს. მეტოქეების სწრაფად გდებისა და ტატამზე შებოჭვის უნარმა ის 2024 წლის პარიზის ოლიმპიურ თამაშებზე ვარსკვლავად აქცია. 2028 წლის ლოს-ანჯელესის ოლიმპიურ თამაშებზე საფრანგეთი მისგან ოქროს მედალს ელის.

რინერმა ხუთშაბათს სოციალურ ქსელში დაწერა: „დებატები და საწინააღმდეგო აზრი ლეგიტიმურია. სიძულვილი და რასიზმი ლეგიტიმური არ არის“.

მანამდე რინერმა საზოგადოებრივ მაუწყებელ France 2-ს განუცხადა, რომ საკუთარ პოზიციას კვლავ საჯაროდ გამოხატავდა. მან თქვა: „მე გავიზარდე საფრანგეთში, სადაც გაჭირვებული ადამიანები ერთმანეთს მხარში ედგნენ და ერთიანები იყვნენ. ჩემთვის უცხოა დღევანდელი მცდელობები, დაყონ საფრანგეთი და არასტაბილურობის განწყობა შექმნან. რას დავუტოვებთ ხვალ ჩვენს შვილებს? მე ის საფრანგეთი მსურს, რომელშიც გავიზარდე და სადაც ყველამ ერთად ცხოვრება იცოდა“.

27 წლის მბაპე პარიზის ჩრდილოეთ გარეუბანში, ალჟირული და კამერუნული წარმოშობის ოჯახში გაიზარდა. მაისში ის RN-ის წარმომადგენლებმა გააკრიტიკეს, მას შემდეგ, რაც Vanity Fair-ს უთხრა: „ვიცი, რას ნიშნავს და რა შედეგები შეიძლება ჰქონდეს ჩემი ქვეყნისთვის მათნაირი ადამიანების ხელისუფლებაში მოსვლას“.

ლე პენმა მაშინ რადიო RTL-ს უთხრა, რომ მბაპეს სურვილი, მის პარტიას არ გაემარჯვა, დამამშვიდებელი იყო. მისი თქმით, თავად მბაპეს სტრატეგიამაც არ გაამართლა: მან პარი სენ-ჟერმენი რეალ მადრიდში გამარჯვებისთვის დატოვა. ლე პენმა თქვა: „გულწრფელად ვფიქრობ, რომ ფეხბურთის გულშემატკივრები საკმარისად თავისუფლები არიან და მბაპეს გავლენის გარეშე იციან, ვის მისცენ ხმა“.