ტენერიფეს თავდამსხმელი ტრავმის შემდეგ ინტენსიური თერაპიის განყოფილებაშია

ტენერიფეს თავდამსხმელი იესუს დე მიგელი ინტენსიური თერაპიის განყოფილებაშია და მისი მდგომარეობა სტაბილურია. ფეხბურთელმა მძიმე ტრავმა ორშაბათს, ესპანეთის მეორე დივიზიონის მატჩისას მიიღო.

30 წლის ფეხბურთელმა თავისა და გულმკერდის არეში დაზიანებები ტენერიფეს შინ, ანდორას წინააღმდეგ გამართული მატჩის დამატებულ დროში მიიღო. ეს ანდორას მეკარე იესუს ოვონოსთან შეჯახების შემდეგ მოხდა.

ესპანური მედიის, მათ შორის Marca-ს ცნობით, დე მიგელს სასწრაფო დახმარების მანქანაში გულის გაჩერება დაემართა. საავადმყოფოში გადაყვანისას მედიკოსებმა მისი რეანიმაცია შეძლეს.

ტენერიფეს განცხადებაში ნათქვამია, რომ მადრიდში დაბადებული დე მიგელი ნუესტრა სენიორა დე კანდელარიას საუნივერსიტეტო საავადმყოფოში გადაიყვანეს. კლუბის ცნობით, ფეხბურთელის მდგომარეობა, მიუხედავად მისი სიმძიმისა, სტაბილური იყო.

ინციდენტის დროს ტენერიფესა და ანდორას ანგარიში 2:2 იყო, მატჩის დამატებითი დრო კი 7 წუთს გასცდა.

ოვონო გრძელი ბურთის მოსაგერიებლად ცენტრალური წრისკენ გაიქცა. როგორც ჩანდა, მისი მუხლი დე მიგელს შეეჯახა.

დე მიგელი მოედანზე გაუნძრევლად იწვა. სამედიცინო პერსონალი მას ეხმარებოდა, შემდეგ კი ტენერიფეს სტადიონ ესტადიო ჰელიოდორო როდრიგეს ლოპესიდან საავადმყოფოში სასწრაფო დახმარების მანქანით გადაიყვანეს.

ინციდენტმა ორივე გუნდის ფეხბურთელები აშკარად შეძრა. დე მიგელის რამდენიმე თანაგუნდელს ცრემლები წამოუვიდა.

მსაჯმა ოვონოს პირდაპირ წითელი ბარათი უჩვენა, შემდეგ კი მატჩი შეწყვიტა.

ანდორას განცხადებაში ნათქვამია: „გვინდა, მთელი ჩვენი მხარდაჭერა და საუკეთესო სურვილები გადავცეთ იესუს დე მიგელს იმ მძიმე ინციდენტის შემდეგ, რომელიც დღევანდელ მატჩში მოხდა.

„ვიმედოვნებთ, რომ ის მალე გამოჯანმრთელდება. ფეხბურთელს, მის ოჯახსა და ტენერიფეს ძლიერად ვეხუტებით“