ტრამპი კრემლის წარმომადგენელს შეხვდა და შეთანხმება დააანონსა

რუსეთისა და უკრაინის წარმომადგენლები უკვე ესტუმრნენ თეთრ სახლს. თუმცა აშშ-ის პრეზიდენტთან პირადად შეხვედრის შესაძლებლობა მხოლოდ კრემლის წარმომადგენელს მიეცა. ამის შემდეგ ტრამპმა შესაძლო შეთანხმება დააანონსა, მაგრამ დეტალები არ დაუსახელებია.

აშშ-ის პრეზიდენტი დონალდ ტრამპი, მისი თქმით, ვაშინგტონში კრემლის მომლაპარაკებელს, კირილ დმიტრიევს, შეხვდა. ამის შესახებ მან თეთრ სახლში ჟურნალისტის შესაბამისი კითხვის პასუხად თქვა.

ტრამპს მოლაპარაკების შინაარსის დეტალები არ დაუსახელებია, თუმცა მიანიშნა, რომ უკრაინის ომთან დაკავშირებით შეთანხმება იქნება. მან ხაზი გაუსვა: „ეს დიდი შეთანხმება იქნება. ის მხოლოდ უკრაინას არ შეეხება და შეიძლება ითქვას, მთელ ევროპასაც კი მოიცვას“.

მისი მტკიცებით, ყველა კმაყოფილი დარჩება. ტრამპის თქმით, ის უკრაინის წარმომადგენლებს, რომლებიც ასევე ჩავიდნენ ვაშინგტონში, არ შეხვედრია.

აშშ-ის პირველი ლედი მელანია ტრამპი ხუთშაბათს თეთრ სახლში მოსკოვისა და კიევის წარმომადგენლებს, მათ შორის დმიტრიევს, შეხვდა. მან უკრაინაში ხანგრძლივი ცეცხლის შეწყვეტის მოწოდება გააკეთა. მელანია ტრამპის თქმით, მაგალითად შეიძლება გამოდგეს გასულ კვირას ქალაქ ოლეშკიში გამოცხადებული ექვსდღიანი ცეცხლის შეწყვეტა.

მელანია ტრამპი ოლეშკიში ცეცხლის შეწყვეტის მიღწევას ცდილობდა. შეთანხმების მოქმედება კვირას დასრულდა. ეს იყო ყველაზე ხანგრძლივი ცეცხლის შეწყვეტა რუსეთის მიერ უკრაინის წინააღმდეგ ოთხ წელიწად-ნახევარზე მეტი ხნის განმავლობაში მიმდინარე აგრესიულ ომში.

რუსეთის ომის დასრულების საკითხზე მომავალ კვირას აბუ-დაბიში, არაბთა გაერთიანებული საამიროების დედაქალაქში, კიევის, მოსკოვისა და ვაშინგტონის წარმომადგენლებს შორის სამმხრივი მოლაპარაკებებია დაგეგმილი.