ტრამპის ადმინისტრაციამ აფრიკაში ამერიკულ კომპანიას 99,6 მილიონი დოლარი ასესხა

აფრიკაში ამერიკული ტექნოლოგიების გამოყენების გაფართოებისა და ბაზარზე ჩინეთის დომინირების შესაკავებლად, ტრამპის ადმინისტრაციამ Africell-ს 99,6 მილიონი დოლარი ასესხა. Africell კონტინენტზე ერთადერთი ამერიკული მობილური ქსელის ოპერატორია.

კომპანიამ პარასკევს დაადასტურა, რომ ფინანსური მხარდაჭერა აშშ-ის ექსპორტ-იმპორტის ბანკმა (U.S. Export-Import Bank) უზრუნველყო.

Africell-ის განცხადებით, დაფინანსება „სატელეკომუნიკაციო სექტორში აშშ-ში დასაქმებას გაზრდის და საზღვარგარეთ ამერიკის ტექნოლოგიურ ლიდერობას გააძლიერებს“.

კომპანია თანხის სამხრეთ აფრიკის ქვეყანაში, ანგოლაში, თავისი ქსელისთვის ამერიკული და ევროპული აღჭურვილობის შესაძენად გამოყენებას გეგმავს. ანგოლის გარდა, Africell კონგოში, სიერა-ლეონესა და გამბიაში საქმიანობს.

ვაშინგტონი ცდილობს, მსოფლიოში ჩინური Huawei-ის გავლენა შეზღუდოს. Huawei მსოფლიოში სატელეკომუნიკაციო აღჭურვილობის უდიდესი მიმწოდებელია და, შეფასების თანახმად, აფრიკის 4G და 5G ქსელების ინფრასტრუქტურის ნახევარზე მეტი ააშენა.

აშშ-ის პრეზიდენტ დონალდ ტრამპის ადმინისტრაციამ მისი პირველი ვადის დროს Huawei-თან დაკავშირებით ეროვნული უსაფრთხოების საკითხებზე შეშფოთება გამოთქვა. ადმინისტრაცია კომპანიის საერთაშორისო გაფართოებისთვის წინააღმდეგობის გაწევას ცდილობდა.

აშშ დასავლელ მოკავშირეებს მოუწოდებდა, მაღალსიჩქარიან უსადენო ქსელებში ჩინური კომპანიის პროდუქტები არ გამოეყენებინათ. ამასთან, ამერიკელმა პროკურორებმა Huawei ტექნოლოგიების მოპარვაში, აშშ-ის სავაჭრო საიდუმლოებების ხელში ჩაგდების დაგეგმვასა და ელექტრონულ და საბანკო თაღლითობაში დაადანაშაულეს.

Huawei-ის წინააღმდეგ ორგანიზებულ დანაშაულებრივ საქმიანობასთან დაკავშირებული სასამართლო პროცესი ამ კვირაში ნიუ-იორკში დაიწყო. თუმცა, Huawei აცხადებს, რომ აშშ-ის ბრალდებები „აშკარად მცდარია“.

ტელეკომუნიკაციების გარდა, ტრამპის ადმინისტრაციამ აფრიკის სხვა სექტორებში პეკინის ფართო გავლენის შესაზღუდადაც გადადგა ნაბიჯები. ეს განსაკუთრებით იშვიათმიწა ელემენტებისა და კრიტიკული მინერალების მოპოვებას ეხება, რომლებიც ელექტრონიკისთვის, ახალი ტექნოლოგიებისა და თავდაცვის სისტემებისთვის აუცილებელია.