ტრამპმა იუსტიციის სამინისტროს დემოკრატების გამოძიება დაავალა

აშშ-ის პრეზიდენტმა დონალდ ტრამპმა შაბათს იუსტიციის სამინისტროს დაავალა, გამოიძიოს დემოკრატები, რომლებიც მისი მთავრობის კონტროლს ცდილობენ. სოციალურ ქსელში გამოქვეყნებულ პოსტში ტრამპმა მათი ქცევა „გამოძალვად“, „სამართლებრივი სისტემის ბოროტად გამოყენებად“ და „კრიმინალურ ქმედებად“ შეაფასა.

გასულ სამშაბათს გამართულ შუალედურ არჩევნებში დემოკრატმა კანდიდატებმა ტრამპის რესპუბლიკელები დამაჯერებლად დაამარცხეს. შედეგად, იანვრიდან დემოკრატები კონგრესში უმრავლესობას მოიპოვებენ. პარტიის ლიდერებმა პირობა დადეს, რომ ხელისუფლებაში დაბრუნებისთანავე მთავრობის ზედამხედველობას აღადგენენ.

კალიფორნიელმა დემოკრატმა კონგრესმენმა რობერტ გარსიამ, რომელიც, სავარაუდოდ, წარმომადგენელთა პალატის ზედამხედველობის კომიტეტის მომავალი თავმჯდომარე გახდება, სამშაბათს განცხადება გამოაქვეყნა. მან მოწინააღმდეგეებს მოკლედ ურჩია: ადვოკატი აიყვანეთო.

იუსტიციის მინისტრმა ტოდ ბლანშმა პარასკევს ტელეარხ Fox News-თან დემოკრატი კონგრესმენების რიტორიკა და განცხადებები გააკრიტიკა: „ამაზრზენია, რომ ისინი კვირის დასრულებასაც კი არ დაელოდნენ“.

ტრამპმა სოციალურ ქსელში გამოქვეყნებულ პოსტში დემოკრატებს ბრალი დასდო, რომ მათ „ბევრ ადამიანს მუქარის წერილები“ გაუგზავნეს, მაშინ როცა ყველა მათგანი უდანაშაულო იყო.

ამასობაში კონგრესის წევრებმა გამოაქვეყნეს წერილების ასლები, რომლებითაც დოკუმენტებს ითხოვენ. მათ შორისაა ინფორმაცია ტექნოლოგიური კომპანიების შემოწირულობებზე, რომლებიც ტრამპის მიერ თეთრ სახლში ასაშენებელი დიდი სამეჯლისო დარბაზისთვისაა განკუთვნილი.

ტრამპის პოსტში მიჩიგანელი დემოკრატი სენატორი ელისა სლოტკინიც იყო ნახსენები. გასულ თვეში სლოტკინმა ჩიკაგოს უნივერსიტეტში გამართულ ღონისძიებაზე თქვა, რომ კონგრესმა იმ ადამიანების საქმიანობა უნდა გამოიძიოს, რომლებმაც ტრამპის პოლიტიკის განხორციელებას შეუწყვეს ხელი. მის განცხადებებს რესპუბლიკელების მწვავე კრიტიკა მოჰყვა.

იუსტიციის სამინისტროს სლოტკინი ადრეც გამოუძიებია. ცენტრალური სადაზვერვო სააგენტოს (CIA) ყოფილი ანალიტიკოსი დემოკრატი კანონმდებლების იმ ჯგუფში შედიოდა, რომლის წევრებსაც უსაფრთხოების სფეროში მუშაობის გამოცდილება ჰქონდათ. სამინისტრომ მათ წინააღმდეგ გამოძიება მას შემდეგ დაიწყო, რაც მათ ვიდეო გამოაქვეყნეს და სამხედროებისა და დაზვერვის თანამშრომლებს მოუწოდეს, მთავრობის უკანონო ბრძანებები არ შეესრულებინათ.