თურქეთმა 419 ანგარიში დაბლოკა და 80 ადამიანი დააპატიმრა

თურქეთის სახელმწიფო სააგენტო ანადოლუს (Anadolu Agency) ცნობით, კიბერდანაშაულის გამოძიების ბიუროს კოორდინაციით სტამბოლის პოლიციამ კვლევა ჩაატარა. მისი მიზანი ოჯახების, ბავშვებისა და ახალგაზრდების ნებისმიერი სახის ძალადობისგან დაცვა იყო.

სააგენტომ დაწერა: „ამ ფარგლებში, სოციალურ მედიაში გავრცელებულ 419 ანგარიშსა და ბმულზე წვდომა დაიბლოკა, რადგან ისინი უხამსი შინაარსის შემცველად მიიჩნიეს“.

დაბლოკილ ანგარიშებს შორის ჟურნალისტების, აქტივისტების, მედიასაშუალებებისა და ქალთა სამოქალაქო საზოგადოების ჯგუფების ანგარიშებია. გაურკვეველია, რომელი მასალა მიიჩნიეს უხამსად.

ვეტერანმა ჟურნალისტმა შირინ ფაიზინმა (Sirin Payzin), რომლის ანგარიშიც ოთხშაბათს დაბლოკეს, განაცხადა: „თუ ფიქრობთ, რომ ჟურნალისტების აკრძალვა და ანგარიშების დახურვა პრობლემებს გადაჭრის, სამწუხაროდ, ძალიან ცდებით“. X-მა მისი ანგარიში თურქეთიდან დაუყოვნებლივ უხილავი გახადა. ჟურნალისტს X-ზე 1,8 მილიონი გამომწერი ჰყავს.

რეიდები, დაკავებები და ინტერნეტის შეზღუდვები ამ ჯგუფებს შეეხო. ზომები ასევე შეეხო დამოუკიდებელ ჟურნალისტებსა და უფლებადამცველ ორგანიზაციებს, რომლებიც პოლიციის ოპერაციას აშუქებდნენ.

სასამართლოებმა ოთხშაბათ ღამესა და ხუთშაბათ დილით ლგბტქ+ უფლებების დამცველი აქტივისტების, მათი მხარდამჭერებისა და ჟურნალისტების დაპატიმრება ბრძანეს. ოფიციალურად სულ მცირე 80 ადამიანი დააპატიმრეს. თუმცა, სტამბოლში ოპერაციის საწინააღმდეგო აქციაზე მანამდე დაკავებული 106 ადამიანი გაათავისუფლეს.

ლგბტქ+ და უფლებადამცველი ჯგუფები აცხადებენ, რომ ოპერაციები გამოხატვისა და გაერთიანების თავისუფლებას, ასევე ადამიანის უფლებების დაცვას უქმნის საფრთხეს. ხელისუფლება ამტკიცებს, რომ გამოძიებები სისხლის სამართლის ფარგლებში ტარდება.

პრესისა და მედიის თავისუფლების ევროპული ცენტრის (European Centre for Press and Media Freedom) მონიტორინგის ოფიცერმა გურქან ოზთურანმა (Gurkan Ozturan) BIRN-ს განუცხადა, რომ პრეზიდენტ რეჯეფ თაიფ ერდოღანის კონსერვატიული ისლამისტური მთავრობის მიერ წამოწყებული ოპერაციები „აჩვენებს, რომ ხელისუფლება როგორც იდენტობას, ისე ინფორმაციას დანაშაულად აცხადებს“.