ტუსკი: რუსეთი ნატოს ქვეყნებზე „შემთხვევით“ დარტყმებს გეგმავს

როიტერსის (Reuters) ცნობით, ტუსკმა დაზვერვის შეფასებები მოიშველია. მან თქვა: „რეალური საფრთხეა, რომ დრონები ან სხვა ტიპის რაკეტები აღმოსავლეთ ფლანგზე ნატოს ერთი ან რამდენიმე ქვეყნის ტერიტორიაზე შეფრინდნენ და ნგრევაც კი გამოიწვიონ“.

ტუსკმა განაცხადა: „ეს შესაძლო დარტყმები, ბრჭყალებში, ‘შემთხვევითი’ ხასიათისა იქნება“. მისი თქმით, მიზანი ნატოს ქვეყნების ნების პარალიზება ან დასუსტება იქნება, რათა წევრ ქვეყანაზე აგრესიის შემთხვევაში მათ ნატოს შესაბამისი დებულებები არ აამოქმედონ.

ტუსკის თქმით, რუსეთის ეს თავდასხმები შესაძლოა დაემთხვეს „პოლიტიკურ ცვლილებებს ევროპის ზოგიერთ ქვეყანაში, რომლებიც ძალაუფლებას გადასცემს [...] მათ, ვინც მშვიდობის, პაციფიზმისა და უაზრო მსხვერპლის შესახებ კეთილშობილურ ლოზუნგებს სულ უფრო ხშირად იმეორებს და მშვიდობისკენ მოუწოდებს“. თუმცა, ტუსკის თქმით, ისინი სინამდვილეში „უკრაინის სრულ კაპიტულაციას“ ითხოვენ.

ბოლო თვეებში დრონები არაერთხელ შევიდნენ ესტონეთის, ლიეტუვისა და ლატვიის საჰაერო სივრცეში. ამ ქვეყნების ხელისუფლებებმა განაცხადეს, რომ დრონები უკრაინული იყო. მათი თქმით, რუსეთის რადიოელექტრონული ბრძოლის გამო დრონები კურსს ასცდნენ და მათ საჰაერო სივრცეში მოხვდნენ.

15 სექტემბრის ღამეს ნატოს გამანადგურებლებმა ლიეტუვის საჰაერო სივრცეში შესული დრონი ჩამოაგდეს. ქვეყნის ისტორიაში დრონი პირველად გაანადგურეს. მოგვიანებით ლიეტუვის პრეზიდენტმა გიტანას ნაუსედამ განაცხადა, რომ დრონი რუსული იყო.

13 სექტემბრის ღამეს რუსეთის ძალებმა დრონებით პოლონეთ-უკრაინის საზღვარზე, იაჰოდინის სასაზღვრო-გამშვებ პუნქტთან მდებარე ბენზინგასამართ სადგურსა და კიევი-ვარშავის სარკინიგზო ხაზზე მოძრავ სამგზავრო მატარებელს შეუტიეს. დარტყმის დროს ახლომახლო კიდევ ერთი მატარებელი მოძრაობდა, რომლითაც უკრაინიდან დასავლელი პოლიტიკოსები ბრუნდებოდნენ. ტუსკმა განაცხადა: „რუსეთის ფედერაციის მხრიდან ესკალაცია ფაქტად იქცევა და ამის მაგალითები სულ უფრო უახლოვდება ჩვენს საზღვარს“.