რუსეთი ევროპულ ანტიტორტურის კონვენციას გამოეთიშა

რუსეთი ოფიციალურად გამოეთიშა ევროპულ ანტიტორტურის კონვენციას. ევროპის საბჭოს განცხადების თანახმად, წევრობის დასრულებასთან ერთად რუსეთის ციხეებზე ანტიტორტურის კომიტეტის დამოუკიდებელი კონტროლიც შეწყდა.

მოსკოვმა კონვენციიდან გასვლის შესახებ ჯერ კიდევ გასულ წელს განაცხადა. ახლა ეს გადაწყვეტილება ძალაში შევიდა.

რუსეთი კონვენციას 1990-იანი წლების ბოლოს შეუერთდა. თუმცა უფლებადამცველები დიდი ხანია აკრიტიკებენ, რომ რუსეთის პოლიციის განყოფილებებსა და საპატიმროებში წამება და დამამცირებელი მოპყრობა ფართოდ არის გავრცელებული. წამების შესახებ საუბრობს თითქმის ყველა უკრაინელი სამხედრო ტყვეც, რომელიც რუსული ტყვეობიდან გაცვალეს.

1998-დან 2021 წლამდე ანტიტორტურის კომიტეტმა რუსეთში 30 ვიზიტისას სულ 450 დაკავების ადგილი მოინახულა. თუმცა რუსეთი ერთადერთი ქვეყანა იყო, რომელმაც ვიზიტების შესახებ ანგარიშების გამოქვეყნება თითქმის არასოდეს დაუშვა. შესაბამისად, კომიტეტმა დოკუმენტების გამოქვეყნება მხოლოდ ოთხი ვიზიტის შემდეგ შეძლო.

რუსეთის მიერ უკრაინის წინააღმდეგ ომის დაწყების შემდეგ კომიტეტმა რუსეთსა და უკრაინის რუსეთის მიერ ოკუპირებულ ტერიტორიებზე წამებისა და არასათანადო მოპყრობის შესახებ არაერთი ანგარიში მიიღო, ნათქვამია განცხადებაში. თუმცა მოსკოვმა კომიტეტს მორიგი ვიზიტის უფლება არ მისცა.

ევროპის საბჭოს მიერ 1980-იანი წლების ბოლოს მიღებული წამების პრევენციის ევროპული კონვენცია ევროპის საბჭოს ხელშეკრულებათა სისტემის ნაწილია. ევროპის საბჭო ევროპაში ადამიანის უფლებების დაცვის სფეროში უდიდესი მთავრობათაშორისი ორგანიზაციაა.

უკრაინის ომის გამო ევროპის საბჭომ რუსეთი 2022 წელს გარიცხა. მოსკოვმა კონვენციიდან გასვლა იმით ახსნა, რომ ანტიტორტურის კომიტეტის მუშაობაში მონაწილეობას ვეღარ შეძლებდა.

ევროპის საბჭოს ცნობით, კონვენციის პრევენციული მიდგომა ისეთივე მნიშვნელოვანია, როგორც ყოველთვის. ანტიტორტურის კონვენციის პრეზიდენტმა ალან მიტჩელმა თქვა: „საპატიმრო დაწესებულებების დამოუკიდებელი მონიტორინგი წამებისა და არასათანადო მოპყრობისგან დაცვის მნიშვნელოვანი გარანტიაა“.