უკრაინის დრონებით თავდასხმისას სოჭში ხუთი ადამიანი დაშავდა

უკრაინის სამხედრო ძალებმა 14 სექტემბრის ღამეს კრასნოდარის მხარეზე დრონებით თავდასხმა განახორციელეს. სოჭში საგანგებო სიტუაციებზე რეაგირების რეგიონულმა შტაბმა განაცხადა, რომ „დრონის ნამსხვრევების ჩამოვარდნის“ შედეგად ხუთი ადამიანი დაშავდა, მათ შორის ერთი ბავშვი. ერთ-ერთი დაშავებული ზრდასრული საავადმყოფოში გადაიყვანეს, დანარჩენებს კი ამბულატორიული დახმარება აღმოუჩინეს. სამი კერძო სახლი დაზიანდა.

როსტოვის გუბერნატორმა იური სლიუსარმა განაცხადა, რომ საჰაერო თავდაცვამ რეგიონის თავზე 50 დრონი ჩამოაგდო. მათ შორის დრონები დონის როსტოვის, ტაგანროგისა და აქსაის თავზე გაანადგურეს. სლიუსარის თქმით, მსხვერპლი არ ყოფილა, თუმცა „ადგილზე ზარალია“. მან დასძინა, რომ რამდენიმე ავტომობილი, საცხოვრებელი შენობა და ელექტროგადამცემი ხაზი დაზიანდა.

რუსეთის თავდაცვის სამინისტრომ განაცხადა, რომ საჰაერო თავდაცვის ძალებმა ღამით 399 უკრაინული დრონი მოიგერიეს და გაანადგურეს.