ვენესუელა აშშ-ის მიწვევით დიდი ოცეულის ენერგეტიკულ შეხვედრას დაესწრება

ვენესუელის დელეგაცია ამ კვირაში ჰიუსტონში დიდი ოცეულის ენერგეტიკულ მოლაპარაკებებს შეუერთდება. ნავთობის მკვეთრი გაძვირება და ახლო აღმოსავლეთის ომით გამოწვეული შეფერხებები გლობალურ ენერგომომარაგებაზე ზეწოლას აძლიერებს. შეხვედრა იმ ფონზე იმართება, როცა დონალდ ტრამპის ადმინისტრაცია კარაკასთან ენერგეტიკულ კავშირებს აღრმავებს და ვენესუელაში ნავთობის მოპოვების გაზრდას ცდილობს.

აშშ-ის ოფიციალურმა პირებმა ორშაბათს განაცხადეს, რომ ვენესუელის დელეგაცია ამ კვირაში ტეხასში დიდი ოცეულის ენერგეტიკულ შეხვედრებში მიიღებს მონაწილეობას. ამ დროს მსოფლიო ახლო აღმოსავლეთის ომით გამოწვეულ ენერგორესურსების მკვეთრ გაძვირებას ებრძვის.

შინაგან საქმეთა მინისტრმა დაგ ბერგამმა განაცხადა, რომ აშშ-ის ნავთობის დედაქალაქ ჰიუსტონში გამართულ სამიტს დიდი ოცეულის ქვეყნებისა და ვენესუელის წარმომადგენლები დაესწრებიან.

ბერგამმა Fox Business-ს განუცხადა: „საუბარია ნავთობის გეოპოლიტიკური ცენტრის ახლო აღმოსავლეთიდან დასავლეთ ნახევარსფეროში გადატანაზე. ახლო აღმოსავლეთში შეფერხებების შესახებ ყველა ეს კითხვა გვაქვს“.

ჰიუსტონის შეხვედრები ოთხშაბათამდე გაგრძელდება. ისინი იმ დროს იმართება, როცა ევროპა გლობალურ ენერგეტიკულ ბაზრებზე შეფერხებების ფონზე, ზამთრის წინ გაზსაცავების შევსებას ცდილობს.

შეხვედრებზე მსოფლიოს უდიდესი ეკონომიკების, მათ შორის, ჩინეთის, ინდოეთის, იაპონიისა და გერმანიის დელეგაციები შეიკრიბებიან. ღონისძიებას ნავთობის მსხვილი მწარმოებლები, მათ შორის, კანადა და საუდის არაბეთიც დაესწრებიან.

ბლუმბერგის ცნობით, მონაწილეებს შორის ვენესუელის ნავთობის მინისტრი პაულა ენაო და სახელმწიფო ნავთობკომპანია PDVSA-ს ვიცე-პრეზიდენტი ჯოვანი მარტინესი იქნებიან.

აშშ-ის მხრიდან ბერგამს ენერგეტიკის მინისტრი კრის რაიტი შეუერთდება.

ტრამპის ადმინისტრაციამ 28 აგვისტოს ვენესუელასთან შეთანხმება გამოაცხადა. შეთანხმება აშშ-ს 65 მილიარდი ბარელი მოცულობის დადასტურებულ ნავთობის მარაგებზე საკონტროლო წილს ანიჭებს.

ბერგამის უწყებამ AFP-ს განუცხადა: „ვენესუელის მონაწილეობა იმ დროს ხდება, როცა ტრამპის ადმინისტრაცია და კარაკასი ენერგეტიკის სფეროში თანამშრომლობას აღრმავებენ, აშშ-ის კომპანიებისთვის შესაძლებლობებს აფართოებენ და ვენესუელაში დამატებით ენერგეტიკულ შეთანხმებებს ესწრაფვიან“.

ტრამპი აცხადებს, რომ აშშ-ირანის ომის გამო ნავთობის გაძვირების დროს ვენესუელის ნავთობს მიწოდების გაზრდა შეუძლია. თუმცა ანალიტიკოსები აფრთხილებენ, რომ ვენესუელაში მოპოვების მნიშვნელოვნად გაზრდას წლები დასჭირდება.