Waymo-მ მგზავრების იარაღის გამო პოლიცია გამოიძახა

რობოტაქსების კომპანია Waymo-ს შეტყობინების შემდეგ, სან-ფრანცისკოს პოლიციამ გასულ კვირას ავტომობილი მაღალი რისკის პროცედურით გააჩერა და ორი არასრულწლოვანი დააკავა. მიზეზი Waymo-ს სალონში დაფიქსირებული ორი მგზავრი გახდა, რომლებიც დატენილ, AR-ის ტიპის მოიერიშე შაშხანას ათვალიერებდნენ. SFGate-ის ცნობით, პოლიციელებმა ავტომობილის გაჩერების შემდეგ მასში ასევე სავარაუდოდ მარიხუანა და წიწაკის აეროზოლი აღმოაჩინეს.

ამ ამბავში ნახსენები Waymo-ს მსგავსი სრულად ავტონომიური ტაქსები მსოფლიოს გზებზე სულ უფრო გავრცელებული სატრანსპორტო საშუალება ხდება. მძღოლის გარეშე მოძრავი ეს ელექტრომობილები სენსორებით, კამერებითა და სხვა მოწყობილობებითაა აღჭურვილი. ყველა მათგანი პროგრამულ სისტემას უკავშირდება, რომელსაც Waymo Driver ეწოდება. მაქსიმალური უსაფრთხოების უზრუნველსაყოფად, სენსორები მგზავრებსაც მუდმივად აკვირდება. ჩვეულებრივ, სისტემა ამოწმებს, არღვევენ თუ არა მგზავრები შედარებით უმნიშვნელო წესებს, მაგალითად, ეწევიან თუ არა ან უსაფრთხოების ღვედი ხომ არ უკეთიათ. ამ შემთხვევაში კამერებმა უფრო სერიოზული რამ ამოიცნეს.

Waymo-ს სალონის კამერებით მეთვალყურეობის პროცედურის შესახებ არსებული ინფორმაციით, ავტომობილის სენსორების მიერ რაიმეს მონიშვნის შემდეგ ჩანაწერს შესაძლოა ადამიანები ამოწმებდნენ. შესაძლოა, ამიტომ მიუთითა წყაროს ცნობამ, რომ AR-ის ტიპის იარაღი დატენილი იყო. ასევე შესაძლებელია, ეს ფაქტი პოლიციამ ავტომობილის გაჩერებისას მოგვიანებით დაადგინა, თუმცა ინფორმაცია რატომღაც Waymo-ს მიერ ცენტრალური სისტემისთვის გაგზავნილ შეტყობინებას მიეწერა.

წყაროს ცნობით, შემთხვევა 3 სექტემბერს, ხუთშაბათს, დილის 4 საათამდე ცოტა ხნით ადრე მოხდა. ადგილი აუტერ-რიჩმონდის უბანში, მე-40 ავენიუს 800-ე კვარტალი იყო. პოლიციელებმა დატენილ, რეგისტრაციის გარეშე დამზადებულ იარაღთან ერთად სავარაუდოდ მარიხუანა და წიწაკის აეროზოლი აღმოაჩინეს. დაკავებულები ბიჭი და გოგო არიან. მათი ასაკის გამო მედიას მათი ვინაობის გამხელა არ შეუძლია. გავრცელებული ცნობებით, მათთვის წარდგენილი კონკრეტული ბრალდებები ცეცხლსასროლი იარაღის უკანონო ფლობას უკავშირდება.

ეს პირველი შემთხვევა არ არის, როცა Waymo-მ მგზავრების შესახებ პოლიციას აცნობა. SFGate-მა მანამდე გაავრცელა ცნობა, რომ სან-მატეოს პოლიცია გამოიძახეს. გავრცელებული ინფორმაციით, ტაქსის სალონში ორი 15 წლის მოზარდი ალკოჰოლს სვამდა და სათამაშო იარაღებიდან ჟელეს ბურთულებს ისროდა.

Waymo-ს რობოტაქსები სან-ფრანცისკოში, ლოს-ანჯელესსა და რამდენიმე სხვა დიდ ქალაქში უკვე ფართოდ დამკვიდრდა. სექტემბრის დასაწყისში მომსახურება სან-დიეგოში, დენვერსა და ფლორიდის ქალაქ ტამპაშიც გაფართოვდა. ავტონომიურ მომსახურებას საქმიანობის ნებართვას აშშ-სა და მის ფარგლებს გარეთ სულ უფრო მეტი ტერიტორია აძლევს.