Anthropic-მა ბუნებრივი აირის მიწოდება ერთ-ერთ მთავარ რისკად დაასახელა

თუმცა, ბოლო თვეებში კომპანია მონაცემთა ცენტრების პირდაპირ იჯარით აღებასა და განვითარებაზე გადავიდა. ამით ის ცდილობს, ტექნოლოგიურ გიგანტებზე დამოკიდებულება შეამციროს და საკუთარ მონაცემთა ცენტრებზე კონტროლი თავად მოიპოვოს. დოკუმენტში Anthropic-მა განსაკუთრებით გამოყო Fluidstack-თან 50 მილიარდი დოლარის პარტნიორობა, რომელიც გასულ წელს გამოცხადდა. კომპანიის თქმით, Fluidstack „მონაცემთა ცენტრების განვითარებისა და მართვის მომსახურებას“ უწევს. Anthropic-მა მონაცემთა ცენტრების ადგილები ტეხასსა და ნიუ-იორკში გამოაცხადა.

ეს ნაბიჯი კომპანიას მეტ რისკსაც უქმნის, მათ შორის ბუნებრივი აირის ფასების ზრდის რისკს. Anthropic-ს უკავშირებენ ისეთ შტატებში მონაცემთა ცენტრების განვითარებასაც, სადაც ადგილზე გაზის მსხვილი პროექტებია დაგეგმილი. მათ შორისაა ლუიზიანა, ტეხასი და დასავლეთ ვირჯინია. Nscale-ის პირველადი საჯარო შეთავაზების დოკუმენტის თანახმად, დასავლეთ ვირჯინიის პროექტი საბოლოოდ შესაძლოა აშშ-ის ერთ-ერთი უდიდესი გაზის ელექტროსადგური გახდეს.

მონაცემთა ცენტრების გეოგრაფიული განაწილება Anthropic-ს გაზის რეგიონული მიწოდებისა და ბაზრის რყევების რისკის წინაშე აყენებს. ეს განსაკუთრებით სამხრეთ-აღმოსავლეთშია მნიშვნელოვანი, სადაც პროექტებს თხევადი ბუნებრივი აირის ექსპორტიორებთან კონკურენცია მოუწევთ.

BNEF-ის ამერიკის კონტინენტებზე გაზის კვლევის ხელმძღვანელმა ენრიკე გონსალესმა თქვა: „გასაკვირი არ იქნება, თუ ლუიზიანასა და ტეხასში, სადაც თხევადი ბუნებრივი აირის ყველა პროექტია თავმოყრილი, გაზი გაძვირდება“.

ტეხასი მრიცხველის მიღმა მონაცემთა ცენტრების განვითარების მთავარი კერაცაა. ამიტომ რამდენიმე დეველოპერს ერთი და იმავე, შესაძლოა შეზღუდული მოცულობის გაზის მიწოდებისთვის კონკურენცია მოუწევს. Anthropic-მა ეს რისკი პირველადი საჯარო შეთავაზების დოკუმენტში აღიარა. კომპანიამ დაწერა: „ველით, რომ ამ ადგილებში მომხმარებლებს შორის იმავე ბუნებრივი აირის მიწოდებისა და მილსადენის გამტარუნარიანობისთვის კონკურენცია გაიზრდება. ამ კონკურენციამ შესაძლოა ასეთ ადგილებში ბუნებრივი აირის ფასი გაზარდოს და მყარად გარანტირებული საწვავის მიწოდებაზე კონტრაქტის გაფორმების შესაძლებლობა დააზიანოს“.

გაზის მიწოდებაზე ნებისმიერმა ზეწოლამ შესაძლოა შინამეურნეობებისთვის ენერგიის გადასახადებიც გაზარდოს. გონსალესის აზრით, ბუნებრივი აირის მწარმოებლებმა 2022 წლის ენერგეტიკული კრიზისიდან გაკვეთილი მიიღეს. მაშინ გაზის მაღალმა ფასებმა წარმოების ზრდა გამოიწვია, რამაც ფასები ისევ დაწია. მომდევნო წლებში ბაზარზე ასეთი უკიდურესი ვითარება ნაკლებად მოსალოდნელია. თუმცა, გონსალესის თქმით, „თუ საბაზო ფასები გაიზრდება, არსებობს ალბათობა, რომ ეს მომხმარებლებსაც დააწვეს, თუ კანონმდებლობა ამას არ შეაჩერებს“.

ამის ერთ-ერთი გამოსავალი, რა თქმა უნდა, განახლებად ენერგიაზე გადასვლაა. მას დამატებით კლიმატური სარგებელიც აქვს, რადგან ნახშირბადს არ გამოყოფს. თუმცა, Anthropic-მა პირველადი საჯარო შეთავაზების დოკუმენტში განახლებადი ენერგია მხოლოდ ერთხელ ახსენა და ისიც უარყო. პროსპექტში ნათქვამია: „ენერგიის წარმოების შედარებით ახალი წყაროები, როგორიცაა მზის და ქარის ენერგია, ბატარეებში შენახული ენერგია, ბირთვული და გეოთერმული ენერგია, შესაძლოა საჭირო რაოდენობით ან ჩვენთვის საჭირო ვადებში ხელმისაწვდომი არ იყოს, ან მხოლოდ უფრო მაღალი ფასით იყოს ხელმისაწვდომი“.

წყარო: Wired

თემებიAmazonAnthropicBloombergNEFCleanviewFluidstackGoogleMicrosoftSpaceXმემფისიColossus

გამოქვეყნდა 28 ოქტომბერი, 2026