Anthropic: რუსეთი აფრიკაში დეზინფორმაციისთვის ხელოვნურ ინტელექტს იყენებს

ანგარიშის თანახმად, Claude ძირითადად რადიოსადგურ Radio Lengo Songo-სთვის განკუთვნილი მასალების შესაქმნელად გამოიყენეს. საერთაშორისო საგამოძიებო გაერთიანება All Eyes on Wagner-ის ცნობით, რადიოსადგურს რუსეთი აფინანსებს. ჟურნალისტების, აკადემიური წრეების წარმომადგენლებისა და ექსპერტებისგან შემდგარი გაერთიანება მთელ მსოფლიოში რუსული დაქირავებული სამხედრო ჯგუფის, Wagner Group-ისა და მისი მემკვიდრე სტრუქტურების საქმიანობას იკვლევს. მათ შორისაა Africa Corps-იც.

Anthropic-ის ანგარიშის თანახმად, მასალები პრორუსული იყო. ისინი ცენტრალური აფრიკის რესპუბლიკის მთავრობასა და Africa Corps-ის დაქირავებულ მებრძოლებს დადებითად წარმოაჩენდა, საფრანგეთისა და ოპოზიციის მიმართ კი კრიტიკულ დამოკიდებულებას გამოხატავდა.

All Eyes on Wagner-ის წევრი ლუ ოსბორნი (Lou Osborn) უახლესი ანგარიშისთვის ჩატარებულ კვლევაში მონაწილეობდა. ოსბორნის აზრით, ეს მეთოდები იმ პრაქტიკის ნაწილია, რომელიც ცენტრალური აფრიკის რესპუბლიკაში Wagner Group-თან კავშირში უკვე გამოვლინდა. მან დოიჩე ველეს განუცხადა: „რამდენიმე ადამიანი დააკავეს, რომლებსაც ტუადერას რეჟიმთან აუცილებლად მჭიდრო კავშირი არ ჰქონიათ. ისინი ამას უკვე რამდენიმე წელია აკეთებენ“. ფოსტენ-არშანჟ ტუადერა (Faustin-Archange Touadera) ცენტრალური აფრიკის რესპუბლიკის პრეზიდენტია 2016 წლიდან.

ოსბორნმა დასძინა: „დაკავებებს ონლაინკამპანიები მოჰყვა გაზეთებსა და რადიოში. ამ ადამიანებს ან საფრანგეთისა და დასავლეთის სადაზვერვო სამსახურების ხელქვეითებად წარმოაჩენდნენ, ან პირებად, რომლებიც ტუადერას წინააღმდეგ გადატრიალებას ამზადებდნენ“.

Anthropic-ის ცნობით, Claude-ს ასევე სთხოვეს, ოპოზიციის წარმომადგენლები შეიარაღებულ მებრძოლებად წარმოეჩინა. მიზანი უსაფრთხოების ძალების წაქეზება იყო, რათა მათ წინააღმდეგ ზომები მიეღოთ. Anthropic-ის განცხადებით, Claude-მა მოთხოვნა უარყო. თუმცა ანგარიშში არ დაუსახელებიათ ოპოზიციის წარმომადგენლები, რომლებსაც უთვალთვალებდნენ. არც შეგროვებული მონაცემების ზუსტი ხასიათი და მათი მიმღები დაუსახელებიათ.

ოპოზიციისთვის Anthropic-ის ანგარიშმა გამოკვეთა, რომ ბანგის მთავრობა და მისი რუსი მოკავშირეები მათ ჩამოშორებას მტკიცედ ცდილობენ. ცენტრალური აფრიკის ხალხის განმათავისუფლებელი მოძრაობის თავმჯდომარე მარტინ ზიგელე (Martin Ziguele) ადრინდელ შემთხვევას შეეხო. მან დოიჩე ველეს განუცხადა: „ამას 2020 წლიდან ვაკვირდებით, როცა მეამბოხე ჯგუფების კოალიცია CPC ბანგის თავს დაესხა. უცნაურია, მაგრამ რამდენიმე მედიასაშუალებამ ყველაფერი გააკეთა, რათა ოპოზიციის გარკვეულ ლიდერებსა და CPC-ს შორის სავარაუდო კავშირები დაედგინა“.

ზიგელემ დასძინა: „ოპოზიციასაც ესხმოდნენ თავს და ამტკიცებდნენ, რომ უცხო ქვეყნები გვიხდიდნენ ფულს. იყო მცდელობა, მიეღოთ კანონი, რომელიც ქვეყანაში უცხოელი აგენტების ყოფნას დაადგენდა. ეს ყველაფერი Wagner Group-ის საქმიანობას უკავშირდება, ისევე როგორც ეს უკანასკნელი მხილება“.