აშშ ევროკავშირის მიერ X-ის დაჯარიმების დავაში ჩართვას ითხოვს

ევროკავშირის ტექნოლოგიური სექტორის მარეგულირებლებმა X გასული წლის ბოლოს ონლაინშინაარსის წესების დარღვევისთვის დააჯარიმეს. ეს პირველი სანქციაა ისტორიული კანონმდებლობის ფარგლებში, რომელსაც ვაშინგტონი აკრიტიკებს.

აშშ-ის იუსტიციის დეპარტამენტმა განაცხადა, რომ ევროკავშირის საერთო სასამართლოს X-ის მხარდასაჭერად მიმართა და საქმის გაუქმების მოთხოვნა წარადგინა.

ევროკავშირმა X-ს სანქცია ბლოკის ციფრული სერვისების აქტის (DSA) ფარგლებში ორწლიანი გამოძიების შემდეგ დაუწესა. აქტი ონლაინპლატფორმებს უკანონო და საზიანო შინაარსთან საბრძოლველად მეტი ზომის მიღებას ავალდებულებს.

აშშ-ის იუსტიციის დეპარტამენტის სამოქალაქო საქმეთა განყოფილების გენერალური პროკურორის თანაშემწემ ბრეტ შუმეიტმა განაცხადა: „ევროკომისია არასათანადოდ შეეცადა მარეგულირებელი უფლებამოსილების გაფართოებას ამერიკულ კომპანიებზე, რომლებიც მის იურისდიქციაში არც იმყოფებიან და არც საქმიანობენ“.

ევროპა მსხვილ ტექნოლოგიურ კომპანიებზე ზეწოლას აძლიერებს, რათა მცირე კონკურენტებმა შეჯიბრება შეძლონ, მომხმარებლებს კი მეტი არჩევანი ჰქონდეთ. აშშ-ის პრეზიდენტ დონალდ ტრამპის ადმინისტრაცია ამ მიდგომას აკრიტიკებს და ამტკიცებს, რომ ის ამერიკულ კომპანიებს გამორჩეულად უპირისპირდება.

ევროკომისიამ, ევროკავშირის აღმასრულებელმა ორგანომ, განაცხადა, რომ მისი კანონები არცერთ ეროვნებას არ უმიზნებს. კომისიის თქმით, ის მხოლოდ ციფრულ და დემოკრატიულ სტანდარტებს იცავს, რომლებიც დანარჩენი მსოფლიოსთვის ეტალონია.

მასკმა არჩევნებში ტრამპის რესპუბლიკური პარტიის კანდიდატებს ფინანსური მხარდაჭერა გაუწია. მან ბოლო არჩევნებში თავად ტრამპსაც დაუჭირა მხარი. მასკის თქმით, ევროკავშირის ტექნოლოგიური რეგულაციები ტექნოლოგიურ პროგრესს აფერხებს.

მას შემდეგ, რაც მასკმა 2022 წელს X, მაშინდელი Twitter, შეიძინა, უფლებადამცველები და ექსპერტები პლატფორმას ფართოდ აკრიტიკებენ. მათი თქმით, პლატფორმაზე სიძულვილის ენა, დეზინფორმაცია და თანხმობის გარეშე გავრცელებული სექსუალური ხასიათის აშკარა შინაარსი გაიზარდა.