Nვიდიას აქციები 5%-ით დაეცა ჯენსენ ჰუანგის ჩინელ ჯაშუშობაში ეჭვმიტანილ ქალთან კავშირის გამო

Nvidia-ს აქციები ორშაბათს წინასაბაზრო ვაჭრობისას თითქმის 5%-ით დაეცა, მას შემდეგ, რაც ტექნოლოგიურმა გიგანტმა აღმასრულებელი დირექტორის, ჯენსენ ჰუანგის, კავშირების შესწავლა დაიწყო ქალ ბიზნესმენთან, რომელსაც სადაზვერვო სამსახურები ჩინეთის ჯაშუშად მიიჩნევენ.

„ნიუ-იორკ ტაიმსისა“ და „ფაინენშალ ტაიმსის“ ცნობით, აშშ-ის სადაზვერვო სამსახურები აცხადებენ, რომ ღრუბლოვანი სერვისების კომპანია MegaSpeed-ის ხელმძღვანელი ალისა ჰუანგი პეკინს ინფორმაციას აწვდიდა.

Nvidia-მ განაცხადა, რომ კომპანიის დირექტორთა საბჭომ დამოუკიდებელი გამოძიება დაიწყო მას შემდეგ, რაც გავრცელდა ცნობები, რომ ჰუანგი „უცხოური სადაზვერვო ოპერაციის“ სამიზნე გახდა.

კომპანიის კვირას გავრცელებულ განცხადებაში ნათქვამია, რომ ჰუანგი „სრულად უჭერს მხარს ამ განხილვას და თანამშრომლობას დაჰპირდა“.

კომპანიის თანადამფუძნებელმა და აღმასრულებელმა დირექტორმა თანამშრომლებს ელფოსტით მისწერა, რომ მან ვერ შეასრულა კოლეგების, დირექტორთა საბჭოს, პარტნიორებისა და მსოფლიოს აქციონერების წინაშე აღებული პასუხისმგებლობა.

ჰუანგმა ელფოსტაში დაწერა: „ცოლს ვუღალატე. ჩემმა საქციელმა მას და ჩვენს შვილებს ტკივილი მიაყენა. ჩემი საქციელის გამართლება არ არსებობს. ძალიან ვწუხვარ“.

როიტერსის ცნობით, ჩინეთის საგარეო საქმეთა სამინისტროს პრესსპიკერმა გუო ჯიაკუნმა ორშაბათს განაცხადა, რომ „ჩინეთის ჯაშუშობის შესახებ ე.წ. ნარატივი“ უსაფუძვლოა.

წინასაბაზრო ვაჭრობისას Nvidia-ს აქციები ბოლოს 4,8%-ით დაბალი იყო.

გამოძიებამ კითხვები გააჩინა ჰუანგის კომპანიის აღმასრულებელი დირექტორის თანამდებობაზე მომავალთან დაკავშირებით.

თუმცა, იორკვილ აივზ ენდ კოს უფროსი მმართველი დირექტორის, დენ აივზის თქმით, ჰუანგის შეცვლის შესახებ ნებისმიერი საუბარი „კომედიაა“.

აივზის თქმით, გამოძიება და სასიყვარულო ურთიერთობა აღმასრულებელი დირექტორისა და კომპანიისთვის „გარდამტეხი მოვლენაა“, თუმცა ეს არ ცვლის მოსაზრებას, რომ ხელოვნური ინტელექტის ჩიპების სფეროში Nvidia ჩინეთს ორი-სამი წლით უსწრებს.

აივზმა თქვა: „თქვენ საუბრობთ იმ ადამიანზე, რომელსაც მე ხელოვნური ინტელექტის ტექნოლოგიის ლიდერად მივიჩნევ, არა მხოლოდ აშშ-ში, არამედ მთელ მსოფლიოში. ინვესტორის თვალსაზრისით, აშკარა შეშფოთებაა, დარჩება თუ არა ჯენსენი აღმასრულებელი დირექტორის თანამდებობაზე. უოლ-სტრიტზე, ალბათ, იტყვიან, რომ დარჩება, თუმცა დირექტორთა საბჭოს გამოძიების ფონზე ყველაფერი შეიძლება მოხდეს და ეს დიდ გაურკვევლობას ქმნის“.