აშშ ირანის დელეგაციას გაეროს შეხვედრებზე დასწრების უფლებას მისცემს

ბი-ბი-სის ინფორმაციით, დასწრების უფლების მქონე ძირითად დელეგაციაში ირანის პრეზიდენტი მასუდ ფეზეშკიანი და საგარეო საქმეთა მინისტრი აბას არაღჩი (Abbas Araghchi) შედიან.

სახელმწიფო დეპარტამენტის პრესსპიკერმა გადაწყვეტილება ხუთშაბათს დაადასტურა. მისი თქმით, დელეგაციას გადაადგილება შეეზღუდება და გარკვეული ამერიკული პროდუქციის შეძენა აეკრძალება.

გადაწყვეტილება იმ დროს მიიღეს, როცა ომის დასრულების ნიშნები არ ჩანს. თებერვალში დაწყებულმა ომმა ენერგიის გლობალური ფასები გაზარდა და მეზობელ ქვეყნებშიც გავრცელდა.

სახელმწიფო დეპარტამენტის პრესსპიკერმა ბი-ბი-სის განუცხადა: „მასპინძელი ქვეყნის ვალდებულებების შესაბამისად, ირანის რეჟიმის ძირითად დელეგაციას გაეროს გენერალური ასამბლეის მაღალი დონის კვირეულზე დასწრება შეეძლება“.

მან დასძინა: „დელეგაციას გადაადგილება შეეზღუდება. ჩვენი პოლიტიკის შესაბამისად, მას ძვირადღირებული და სხვა საქონლის შეძენა აეკრძალება. დელეგაცია შარშანდელზე მცირეა“.

გასულ წელს ირანელ დიპლომატებს Costco-ს მსგავს საბითუმო მაღაზიებში საყიდლებზე სიარული აეკრძალათ. ძვირადღირებული საქონლის, მათ შორის, სამკაულების, ალკოჰოლისა და ავტომობილების შესაძენად მათ აშშ-ის ნებართვაც სჭირდებოდათ.

სახელმწიფო დეპარტამენტის პრესსპიკერმა ტომი პიგოტმა (Tommy Pigott) განაცხადა, რომ აშშ დიპლომატებს „საყიდლებზე ხელაღებით ხარჯვისგან“ შეაკავებს. ამავე დროს, ირანელი ხალხი წყლისა და ელექტროენერგიის დეფიციტს, „სასტიკ რეპრესიებსა“ და „მკვეთრად მზარდ ინფლაციას“ უმკლავდება.

პიგოტმა X-ზე დაწერა: „ირანის რეჟიმის ელიტას არ მივცემთ უფლებას, გაეროს გენერალური ასამბლეა ძვირადღირებულ მაღაზიებში ფულის ფლანგვისთვის გამოიყენოს, რასაც ირანელი ხალხის ტანჯვის ხარჯზე გადაიხდის. ამავე დროს, რეჟიმი ირანის სიმდიდრეს თავისი ტერორისტი მოკავშირეების მხარდასაჭერად მიმართავს“. მან ნიუ-იორკის მაღაზიები გააფრთხილა, რომ დელეგაციისთვის საქონლის მიყიდვისას „ფხიზლად იყვნენ“.

პიგოტს არ უთქვამს, ჰქონდა თუ არა აშშ-ს ინფორმაცია, რომ დელეგაცია ძვირადღირებული ნივთების შეძენას გეგმავდა.

ამჟამად გაეროს გენერალური ასამბლეის 81-ე სესია მიმდინარეობს. ყოველწლიური ღონისძიების მთავარი ნაწილი, გენერალური დებატები, სამშაბათს უნდა დაიწყოს.

სამშაბათს სიტყვით გამოვლენ აშშ-ის პრეზიდენტი დონალდ ტრამპი, გაერთიანებული სამეფოს პრემიერ-მინისტრი ენდი ბერნემი (Andy Burnham) და საფრანგეთის პრეზიდენტი ემანუელ მაკრონი.

სავარაუდოდ, ოთხშაბათს სიტყვით უკრაინის, სირიისა და ირანის ლიდერები გამოვლენ.